周四晚美股個別發展,杜指反覆靠穩,微吐4點,但納指則大跌3.9%,拖累亞洲科技股大跌,日、韓、台股市平均跌逾3%,港股中亦以電訊科技股跌幅較大,但滙豐(005)反彈令恒指跌幅收窄,最後收9773,跌111點。一周埋單,恒指大跌552點,跌幅5.3%。今個禮拜幾乎肯定跑輸杜指。
期指下周二結算,睇過去幾日港股走勢,淡友明顯壓價結算。恒指噚日再創9687今年新低,去年9月尾恒指有個9663至9602嘅上升裂口,不妨睇吓好友能否保住呢個支持區結算期指。如守得住,港股或有短線反彈,若升破降軌(現處10160)阻力,則初步轉勢。
滙豐噚日反彈0.75元,收85元,可惜成交較薄。過去3日滙豐在84元水平築底,但技術方面仍偏弱,滙豐是否淡友最後撒手鐧,下周一將有分曉。
細價股噚日出現小股災,特區政府又一典型「好心做壞事」例子,小股民未見其利先見其害,引來怨聲載道。董建華連任後急於求成,希望有所交代,屬下官員自然不敢怠慢,幾乎個個局長及部門都要爭取表現,向老闆交差,可惜眼高手低,思慮不周,更令民怨沸騰。艱難時期,凡推新政應審時度勢,其實有時無為(不妄為)勝有為。
趙飛雲