PS2暑假重頭大作《GTConcept2002東京－日內瓦》啱啱喺前日（7月25日）推出，為隆重其事，同日舉行咗一個名為「GT之父賽車祭」嘅活動，當然唔少得有GT之父綽號嘅山內一典先生出場，同機迷揀車影相簽名留念。場中更史無前例咁擺放十部歐日名車，有啲重係首次登陸香港㖭。
記者、攝影：徐影龍
「賽車祭」一開始先嚟一個車王鬥車神作熱身。由勝出「新地三菱盃」九龍區冠軍，自稱「九龍車王」嘅王國倫，挑戰由日本遠道而來嘅GT之父山內一典先生。雙方以三菱AIRTREKTURBO-R作賽，惡鬥兩圈後，終由GT之父大熱勝出，不過九龍車王亦唔係輸好多，總算見到尾燈。
之後GT之父更輪流接受傳媒及其他機迷嘅挑戰，每次總係由山內先生嘅褔特「GT40」勝出，更甚者鬥兩個圈都可以快其他人多一個圈，認真厲害。技壓群雄後，山內先生開始為機迷帶嚟嘅《GT》遊戲碟、海報等簽名，呢個重係日本以外首個簽名會，可見山內先生對香港機迷係幾咁重視。
史上最受歡迎賽車Game《GT》系列最新作，《GTConcept2002東京－日內瓦》顧名思義除咗加入日本新車外，重有日內瓦車展中亮相過嘅新車。遊戲內容完全中、英文化，對於不諳日文嘅玩家可謂至適合，遊戲內上至賽車模式，下至性能調整，都可清楚了解各零件用法，玩起上嚟零舍投入。
對應機種：PS2
遊戲類型：賽車類
開發商：SCE
價錢：$185
(c)2002SonyComputerEntertainmentInc.Allmanufacturers,cars,names,brandsandassociatedimageryfeaturedinthisgamearetrademarksand/orcopyrightedmaterialsoftheirrespectiveowners.Allrightsreserved.
山：山內一典先生 記：記者
記：點解今次《GTConcept2002》只在亞洲地區發售，而且連日本本土都冇？
山：呢個係我上次嚟香港畀機迷嘅第一個承諾，雖然可能會令日本機迷失望，不過香港機迷熱情一面令我印象難忘，所以我回國後便全力開發《GTConcept2002》中文版。
記：加入大型車展嘅新車種而推出新作，從此會否成為慣例？
山：這主意倒不錯！雖然暫未有咁嘅打算，不過已預計會到訪今年尾在巴黎舉行的車展，可能因而推出新一集《GTConcept2002東京－巴黎》也不定。
記：多次跟香港機迷切磋，覺得跟日本機迷有咩唔同嘅地方？
山：香港機迷普遍年紀較細，而且肯花時間鑽研技巧，相當之聰明厲害。相反在日本玩《GT》主要像我年紀般的人，總括來說是香港機迷玩得更好。
記：請透露一下《GT4》嘅開發情形。
山：目前只可以講將會對應Internet連線，相信較令香港人興奮的，便是《GT4》將會加入香港為背景的賽道，這是我對香港機迷的第二個承諾，不過採用哪條道路尚未有定案，在上月亦曾派員到港作實地視察。
後記：
在《GT4》中加入香港跑道的確令一眾Fans更為投入，不過據推測應該唔會係龍翔道、公主道等熱門鍊車路線，反而往返機場嘅青嶼幹線機會較大，事關沿途風景不俗之外，像青馬大橋、新機場等建築物更能凸顯香港之特色，熱切期待2003年尾推出嘅《GT4》。
場中擺放十部歐日名車作展示，有啲重係專程由日本運嚟香港作首度亮相，冇機會揸都可以睇住相頂吓癮先。