港交所（388）推出細價股除牌機制建議，結果導致細價股股災，幾百隻細價股全面下挫，頭20隻股仔跌40%至90%，散戶呢次真係血本無歸。周四深夜，阿虎接到唔少親朋戚友來電問除咗牌即係點？原來好多人都唔除牌究竟係咩一回事，佢哋淨係知道自己手持嘅股仔唔夠5毫子。
其實，所謂股價低於5毫要除牌，應該講成如果公司唔將股份合併達至5毫子或以上，先至可能被除牌，再講白啲就係港交所以停牌作為手段，迫使公司將股份合併。呢一次股災其實主要係因為港交所與市場溝通不足，港交所今次都可謂做咗「仙股罪人」咯。港交所唔知有冇考慮到，若細價股嘅大股東有心私有化，而唔作出併股，小股東點算呢？會唔會要呢啲公司向股東作出回購或提出全面收購呢？
ｉ師傅話聽到，經紀行已進一步收緊細價股孖展，相信細價股跌勢將會持續。本地散戶近年都頗陰功，先被電訊盈科（008）蒸發數以千億元資金，再被長江生命科技（8222）及中銀香港（2388）縛多80億元，再加埋噚日細價股股災，相信散戶資金已經所餘無幾。阿董唔通嫌玩殘樓市唔夠喉，重想拖垮埋個股市？
噚日兆晉國際（491）曾大跌94%，低見1仙，收2.1仙，跌幅達87.65%，成交股數達25.8億股，金額達5130萬元。據聞係因為主要股東被一間台資證券行迫倉，莊家亦趁勢洗倉，與此股是否細價股無關。
下個禮拜期指結算，市場氣氛差，歐美股又持續下滑，完全是淡友用武之地，阿虎真係冇眼睇？
阿 虎