有睇開DrFun手記，都會覺得我DrFun尖酸刻薄，輸波又鬧，贏波又鬧，不過今次我就想讚吓四戰未開齋嘅鳳凰。
女子組嘅鳳凰因為傷兵多，之前三場比賽都俾對手大炒；噚日對住藍鯨，就算贏波，都只係得一絲可能出線。不過隊員仍鬥志十足咁打到最後一秒，而且兩個傷兵鍾詠璇同陳靜怡重帶傷坐喺場邊打氣，係咁嗌住「鳳凰！精神！」；雖然最後鳳凰都難逃一敗，不過佢哋已充份表現咗團結精神。
反而男子組十九歲組嘅銀鷹同樣未贏過，不過睇嚟就冇咁團結，個教練係咁指住球員嚟鬧，班球員就愈打愈躁；半場只不過落後畀野狼六分，到最後點？咪輸成三十二分囉。所以我DrFun話齋，打波贏輸唔緊要，最緊要贏鬥志贏精神。