從事攝影創作的夏永康在剛出版的八月號英國潮流雜誌《i-D》，以百分百本地班底，找來舒淇與吳彥祖為模特兒，拍攝了一輯極富戲劇味道的照片，並帶出香港文化有很多可取之處的訊息。
衝出本地進軍外國市場已經不是幕前明星的專利，一直與王家衞合作的攝影師夏永康，成功打入日本市場後，最近他更自組本地班底包括幕前幕後工作人員，為英國潮流雜誌《i-D》拍攝了一輯照片，風格十分moody，極有戲劇的味道。
據知該輯相面世後，在英國的反應極佳，《i-D》更旋即邀請夏永康為他們再次操刀拍攝新一輯相。
夏永康為《i-D》拍攝的照片所用的班底，全是精英分子，夏永康負責攝影，星級化妝師Zing為舒淇及吳彥祖化妝，文念中負責場地布置的概念。
問夏永康這輯照片其實想帶出甚麼訊息予英國的《i-D》讀者？他昨日在電話訪問中說：「我希望展示出香港製作人嘅實力，話畀大家聽香港文化有好多可取之處，唔係只係模仿同抄襲。」
夏永康續說：「我影呢輯相，喺燈光方面刻意想moody啲，好似電影劇照咁。而批相內嘅舒淇都唔係大家見慣嘅性感女神形象，反而流露出佢童真嘅一面。我哋影嘅呢輯相，動用嘅工作人員連埋臨時演員在內，有成二十幾人，好似拍戲咁認真，英國《i-D》嗰邊派咗個做styling嘅工作人員嚟，佢見我哋咁大陣仗，都好驚訝。」
由於這一輯照片令《i-D》很滿意，雜誌旋即邀請夏永康為他們再操刀。
而已經拍攝好的新一輯未面世照片，夏永康表示以上海為主題，他說：「我本來想搵內地女星周迅做model，但係最終度唔到期，最後我哋搵咗一個外形富濃厚中國味道嘅model演出。」