銅鑼灣時代廣場地庫city'super，由今日起至下周日搞咗個台灣美食節，除咗有特色冰品、飲品、醬油等緊你哋去買之外，喺購物之餘，同時更有抽獎。另外亦有即炸即食食品賣，保證新鮮、衞生及美味，全部都好有台灣風味，你又點可以錯過呢！
記者：陳冰麗
攝影：伍慶泉
Model：Octavia
只要喺台灣美食節期間購物滿$300，即可獲贈抽獎券一張，贏取獎品，獎品包括：
1.長榮客艙機票來回台北兩張，名額一名。
2.city'super禮品儲值卡$300，共四名。
3.鳳梨酥禮盒，合共24盒。
台灣盛產菠蘿，所以今次台灣美食節又點可以無佢份呢！大熱天時，嫌食冰沙或雪糕解暑無咁有益，咁呢款以新鮮菠蘿做成嘅冰條，絕對係至佳之選，凍冰冰再加上酸甜嘅味道，食完包保大家暑氣全消，其他地方絕對食唔到㗎，$8一條，另一款加多咗冰糖嘅新鮮菠蘿冰條，略貴少少，每條$12。
$8及$12條
飲用果醋已成潮流，其味酸甜夾集，醒胃又醒神，更有助消化㖭！圖中呢三款醋飲，包裝精美，顏色鮮豔，飲完個樽重可以載水循環再用。有三種口味：梅子味、雜果味及檸檬味，每樽280毫升。
呢款炒麵或者可以帶畀大家另一新驚喜，同樣只需要注入滾水，待麵熟咗，倒去水份後，再拌入調味醬包撈勻就食得，麵質爽口彈牙，調味醬又夠香濃惹味。有包裝及碗裝，兩者同時隨麵都附送一包茶包在內，食完炒麵，重可以即時歎番杯茶㖭！
敍攤沙茶牛肉炒麵$9碗
敍攤辣子雞丁炒麵$5.5包
米粉係台灣省新竹市嘅特產，歷史悠久，全部由人手製造，米粉幼細如絲，口感滑溜，老少都啱食，炒、放湯或打邊爐都啱。關廟拉麵是台南特產，一包有兩個麵餅，同樣以人手製造，絕無添加防腐劑成份，麵質口感獨特，爽口彈牙，久煮亦唔易爛。
新竹米粉$10包(左)
關廟拉麵$13包(右)
講求健康嘅人士，必要試試呢款有機豆奶冰淇淋。呢款消暑良品以有機黃豆、砂糖、麥芽糖、椰子糖等所做成，不含奶成份，天然健康，對奶有敏感都會啱食。有機豆奶冰淇淋賣相近似一磚豆腐，入口滑而透心涼，有原味豆腐及芝麻豆腐兩種口味。
$13盒
以果汁和刨冰製成嘅冰沙，係夏日至佳消暑良品。有兩種口味，分別係荔枝冰沙及芒果冰沙，前者清香，後者則有香濃嘅芒果清甜味，配以冰同食，入口即溶，好爽。
$10杯
呢三款係台灣出品嘅日式醬料。壽喜燒係一款地道日式火鍋醬，以柴魚、昆布、鹽、醋、醬油等成份所做，成份天然，不含人造色素或添加劑。芝麻沙拉醬則用途廣泛，除咗可以拌蔬菜做沙律外，亦可作為蘸肉食，甚至作為麻醬拌粉麵食用又得。燒肉料理醬亦係一種富日本風味嘅醬油，主要用作蘸肉，以增添肉嘅鮮味，但又唔會搶走肉嘅原來肉質味，非常好用。
壽喜燒(左) $36樽
芝麻沙拉醬(中) $36樽
燒肉料理醬(右) $36樽
肉燥醬係台另一特產，以古法煉製而成，主要用料有濃縮豬骨汁、多種香辛料、調味料、精製紅葱頭等，肉燥醬用途廣，拌飯拌菜，甚至加入湯圓內做成鹹食法亦相當不俗。
$59樽
想即時品嘗到台灣風味食品，就要試即場嘅炸物，包括甜食嘅紅豆球、炸芝麻球、黃金球，分別係紅豆餡、芝麻餡及芋頭餡，全部$12，有十粒；亦有鹹食海鮮串燒，如龍蝦棒、鮪魚燒等，$10串。
$12
呢款油飯係方便即食飯，只要取出盒內嘅飯包，放入滾水內烚約10分鐘即食得，又或放微波爐高溫加熱亦可。油飯係以糯米做飯，入口煙韌甘香，又以豬肉、魷魚、香菇、蝦、葱等做餸，飯味香餸菜多。
$12盒