港交所大掃除，垃圾公司一概要Out，為保障投資者，大方向正確，但好揀唔揀，揀正股市人心惶惶之時宣布，即時嚇到散戶雞飛狗走，結果又引發一場股仔大災難。如假包換嘅垃圾股係罪有應得，但好多實力股亦受拖累，無妄之災，冤向誰訴？
噚日恒指跌111.6點，跌幅1.1%，但股仔就散晒。50大下跌股中，佔咗8成係仙股，跌幅好得人驚，超過20%者，比比皆是。港交所建議嘅除牌機制，主板上市公司股價連續30個交易日低於0.5元，或市值不足5000萬元，就會被除牌，主要係針對一直困擾市場嘅「仙股現象」，以及唔再畀無良大股東藉着一貫的造落手法來魚肉股民，但港交所話到明，除牌後唔會再有渠道買賣，嚇到股民掟咗先算，仙股當然首當其衝，仆到直。
除牌機制只係建議，開始諮詢業內意見，最快都要明年初先會實施，而實施後亦會有1年過渡期。0.5元呢個「除牌價」，係現時最低掛牌價1仙的50倍，受牽連的主板公司更有300多家，「除牌價」合理否，大有商榷餘地，相信市場反應的聲浪必然好大。
回歸之後，一個「8萬5」整死咗樓市，𠵱家一個「0.5元」又整死個股市。噚日午後，突然之間天昏地暗，兆頭不妙，香港幾時才會轉運？
大市連跌3日，恒指一度下跌近200點，尾市略有反彈，仍跌111點，成交80億元。滙豐控股（005）似已在84元水平找到支持位，噚日收85.0元，逆市而升0.75元。中銀香港（2388）亦由8.0元水平回升，收8.25元，升0.15元，成交1.08億股，沽售壓力已見減輕。
恒生銀行（011）跟市而跌，收82.25元，跌1元，往績PE15.5倍，息率5.95厘，以中線投資為出發點，已屆吸納時刻，若有機會在80元水平入市更佳。恒生有近6厘息，難得！
郭兆誠