面對港交所（388）嘅新建議，同埋證監會叫小投資者應該改變觀念，咪亂玩細價股，小初當堂無言以對，尤其係見到噚日以兆晉（491）為首嘅股仔大插水，就更加感到未來二三線嘅炒作環境將極之暗淡。小初呢類愛冒險嘅炒鬼，可能再冇生存空間。
講真句，兆晉呢隻股仔小初以前都炒過吓，亦曾經賺過錢，但收尾因為再冇收到風，所以就冇再掂。
噚日佢跌咗9成咁多，小初先至再睇番，一睇之下，先發現佢原來在1年內，由5仙一條氣炒上嚟，去到20仙樓上咁勁，早排乜股都跌之時，佢都唔跌，點知一插水，就回到未升時。
經紀陳話，兆晉炒作多時，所以好多經紀行唔多唔少都有呢隻股嘅倉，所以一急跌就好多盤跟住一齊沽，導致股價唔夠一個鐘就跌足9成，今次真係唔知個莊點收科？
慕容小初