「位元堂、養陰丸，好似太陽咁溫暖……太陽出來了！」一首耳熟能詳的歌曲，由70年代鄭少秋主唱至𠵱家嘅21世紀代言人李克勤，一樣令人即時聯想起已有105年歷史的中藥老字號位元堂。
前年年底，宏安集團以1.26億元買入位元堂99.79%權益，舊年康健又斥資3000萬，向宏安買入位元堂24%權益。位元堂撚咗大老細，商品代言人亦由年輕偶像李克勤取代，由位元堂持有嘅物業，就喺今年年初先委託代理放售，最近更率先售出第一項。
中原潘志明向蘭西報料，啱啱賣出嘅係上海街356號位聯樓地舖，1005方呎，由位元堂黎氏家族持有，以490萬元轉售予投資者。舖位由位元堂承租，每月租金3.7萬，租期至05年6月，租金回報率有9厘。
事實上，位元堂放售嘅一籃子物業，有一半都連租約，部份更連外牆廣告位，好似荔枝角道位元樓地下及閣樓舖位，就係一個好例子，亦足見呢間中藥店嘅江湖地位！
蘭西翻查歷史，知道位元堂喺清光緒23年（1897年）開業，老舖開設於廣州市，並以養陰丸馳名。創辦人為廣州官宦世家出身嘅黎昌厚，佢聯同其他三個家族，同兩位獨立人士，喺廣州漿欄街44號開設第一間廠，經營中草藥批發買賣，早於1930年已喺荔枝角道開分店。直到1952年先至關閉廣州總店，搬嚟香港，1970年廣州生產線亦正式遷移到香港。睇完呢段歷史，就知佢哋有幾老字號。
工廈市道喺工業北移下大受打擊，非地鐵沿線工廈，好似葵涌達利中心，早前錄得呎租一蚊個案，近期就連有地鐵優勢嘅觀塘區物業，租金都跌咗一大截。中原李海文話，觀塘南豐工業大廈低層單位，1.6萬方呎，每呎租金僅個一銀錢，每月即係萬七銀，用嚟擺貨都抵啦！嗰幢大廈呎租一向都企喺2蚊樓上。
觀塘區工廈除咗租金大跌外，造價都企唔穩。聽李海文講，開聯工業大廈B座13樓06室，2363方呎，係銀主貨，喺拍賣場以80萬元賣咗，每方呎339元，創該區新低價。同廈B座7樓06室，單位面積一樣，上月底都值102萬元，呎價432元，唔夠一個月，就跌咗兩成幾，真係無眼睇。唔怪得發展商寧願丟空啲工業地都唔肯起樓啦，免致蝕到渣都冇。
新地的珀麗灣搞得如火如荼，香港興業都唔執輸，啱啱先為愉景灣海澄湖畔二段諗咗「1001夜越洋浪漫之旅」嘅promotion，噚日又話為大嶼山藍天海岸今個禮拜六開始啓動嘅網站
東涌海堤灣畔噚日率先開放現樓示範單位畀代理睇，為咗做生意，有啲代理就拉埋個客去睇樓，搞到大排長龍。發展商只係喺下晝三點到五點開放現樓單位，淨係開三部𨋢載客，結果出現幾百人排隊場面，即使打尖插隊，都要等成個鐘先至入到個示範單位。蘭西聽講期間有人睇完示範單位之後，落到樓下，就不支暈倒，搞到要call白車。
蘭西
電郵地址：