物極必反，美股終於出現大反彈，杜指周三晚先跌170點，然後倒升488點。前晚杜指走勢係一個典型挾倉嘅例子，杜指初段升至7970水平受壓，其後3個鐘有心人以7800做底線收集淡倉，之後挾爆7970阻力，最後1個鐘，平倉盤推動杜指升多200點。杜指雖大反彈近500點，但技術指標仍偏淡，不過近日美元似度過最壞時刻，對美股可能有支持。
至於噚日港股先升後跌，有睇本欄嘅讀者相信會明點解。唔知係咪有人極度睇淡後市，噚日部份Put輪如恒指輪9205及滙豐輪9234升大咗好多，似乎睇死港股今日將大跌，由於輪價已先行反映跌勢，聰明嘅讀者應知如何執生。
趙飛雲雖愛冒險，但唔想打冇把握嘅仗，近日美股風急浪高，而港股一時跟一時唔跟，就算睇中大趨勢，亦隨時俾急驚風吹落海，黑起上嚟隨時左一巴右一巴，所以趙飛雲寧願睇定啲再出擊。
唔少淡友近日對大笨象滙豐（005）虎視眈眈，大有一出現腳軟情況，即蜂擁而上狂噬，以上情況可由滙豐Put輪表現可見。事實上，各大藍籌均跌穿頸線向911事件低位進發，暫時惟有滙豐仍守頸線附近，最具造淡值博率，趙飛雲唯一憂慮係股市亦經常如跑馬，大熱門通常死火。
趙飛雲