為咗遏止社會上一股自殺風氣，負責「救人」嘅社工團體挖盡心思搞咗唔少宣揚積極人生嘅計劃，早前「蘋果基金」不甘後人成立咗個「熱愛生命基金」，收咗城中名人一筆大額善款捐咗畀基督教香港信義會，支持「生命天使」行動；一股天使齊齊拍翼關懷社會嘅旋風由此捲起，又點可以畀佢停落嚟呢！
明愛樂謙展能中心由今日起一連三日，搞咗個「熱愛生命大行動」慈善籌款，一班天王歌星郭富城、陳奕迅、楊千嬅、TWINS及容祖兒等擔任熱愛生命大使，親筆寫咗啲勵志語句：「堅毅不屈」、「珍惜生命」、「生命冇take2」等，製成「墨寶襟章」義賣，每個二十元。
會場內重有樂謙中心一班殘障學員親手製作嘅各款精品，佢哋想話畀大家知，雖然身有殘障及智力障礙，但都能積極生存，自強不息，實在值得身處逆境嘅人士借鏡。
呢次行動籌到嘅善款，百分之七十五捐畀「熱愛生命基金」，繼續資助社會服務機構推行有關防止自殺嘅計劃。各位一家大細記得到場多多支持嘞！
傳真︰2623-9278
電郵︰