食回頭草嘅雲高爾早幾日解釋巴塞隆拿會方決定棄用李華度，原因係對方對隊波唔夠「Heart」（鬥心），話口未完，李華度即刻反擊，話實情係雲高爾妒忌佢幫巴西捧世界盃，吃不到的葡萄是酸的喎。
「佢帶領唔到班荷蘭球員踢世界盃決賽周，擺明係搵我出氣啦！」估唔到李華度唔止好波，連𢱑爛腳窒人都咁醒，真係抵佢發達。
朗尼莊臣一直無落腳地，據講費格遜日前邀請佢參加季前集訓，佢當然點晒頭應承啦，因為如果佢表現好，踢得番曼聯都未定。朗尼重好識做，即刻猛讚曼聯點好點好，擺明送秋波啦。朗尼雖然成日傷，但夠穩陣，落場少甩拖，查實曼聯真係簽番佢都唔係壞事。
唔知係咪之前使錢太多，富咸今屆靠借用球員擴軍，不過老細阿法耶茲喺個人生活方面繼續一貫闊佬作風，據講用咗成一萬鎊搞個私人廁所。作為富咸球迷，啱啱聽見球會唔肯用錢，所以斟荷蘭國腳史高拉最後都搞唔掂，𠵱家即刻聽到老細自己咁「豪」，都咪話唔難受。
米路天奴域離開咗國足後，教頭位置一直懸而未決，前排話未必再請外國教練，但新近話都係屬意外國人，聽聞重搵過一啲巴西球會教練或技術總監之類人物。我求大俠就對呢個取向有保留，因為班國腳近年都慣咗歐洲打法，點可以一下子改學巴西人的技術同意識，即係等如話由頭學過，咁咪即係搵嚟搞！