中銀香港上市全城矚目，八方早上九時到聯交所參加上市儀式，現場水洩不通，連莊世平也親臨捧場。朱總理千金、中銀香港總經理之一嘅朱燕來亦現身。外語能力一流嘅中國銀行副行長和廣北則在大堂與劉明康行長等齊齊主持儀式。滙豐銀行總經理柯清輝代表公益金，接受中銀香港總裁劉金寶捐贈的一百萬支票，以換取「二三八八」的幸運編號，可惜中銀香港仍跌破招股價。
傍晚五時，八方又到會展新翼參加中銀酒會，城中巨富幾乎到齊，獨欠李嘉誠三父子。新世界主席鄭裕彤同八方講，佢申請認購十一億七千萬元，獲得六千多萬股。八方計計，呢批股票價值五億多元，可惜昨日咁跌法，已經輸咗二千四百萬元以上，但彤叔一點都冇唔開心，話「睇股價唔係睇一日」。
恒隆董事長陳啟宗就用公司名義買了三千萬美元中銀股票，帳面損失一千一百萬元。利豐主席馮國經同八方話冇認購，因佢係中銀香港非執行董事。再問其他銀行家，永隆董事長伍步高話認購了少少，上海商業銀行主席甄錦鵬也買了少少，李國寶則話自己同東亞都認購了少少，郭炳聯亦話認購數千萬美元。齊齊做晒富貴蟹。
傳真︰2623-9278
電郵︰