美股周三反彈近500點，但港股昨日則跌87點，收9884。中銀香港（2388）連散戶認購價8.075元亦差點守唔住，睇嚟人心相當虛怯，下周二就是期指結算，淡友可能會喺呢一兩日大力造淡等收成。不過，外圍股市一時大跌一時大升，後市實在好難玩。
中銀香港保薦人高盛一開波已經在8.50元力守，但沽盤漸大，高盛一路退守，好耐都未見過高盛咁狼狽，股價重一度跌至8元，收8.10元。幾間大行更即日推出中銀香港認購證，包括法興、一波及荷銀，其中荷銀嗰隻行使價低於8元，但冇耐即刻話取消，唔知係咪怕俾人秋後算帳。
神州醫療（8186）配售後股價先升後跌，收0.55元，跌5.2％，跌破埋配股價0.57元。據黑客話，佢哋原本諗住發行8000萬股新股，但由於市場反應一般，因此要將發行額縮至3500萬股，集資額縮至1995萬元。
據聞有主要股東於股份復牌後沽售股份，令到成交增加至7280萬元，股數達1.24億股。今次公司配完股，即刻有主要股東減持，好容易令到班承配人方寸大亂，所以有貨要小心。
御泰國際（155）以8000萬元向大股東收購御泰融資香港，成為股權易手以來首次注資活動，刺激股價反彈。此股近期積弱，其實幕後人士一直想做嘢，今次收購行動只係一連串收購嘅開始，好戲陸續有來。Cookie話，由於炒股資金未到位，因此御泰股價短期難有表現。
阿 虎