劉嘉玲日前喺台灣出席瑞士浪琴表嘅一個晚宴，她穿上一襲黑色嘅MiuMiu吊帶裙，十分性感。由於嘉玲係浪琴表嘅「優雅形象大使」，所以佢呢次出席有關宴會都係義務性質，大會為答謝嘉玲咁幫手，將會送伊人一隻浪琴鑽表做禮物。
大會搞呢個晚宴，主要係宴請台灣代理浪琴表嘅負責人，眾賓客見到美豔嘅嘉玲，即爭相同嘉玲合照，搞到嘉玲立刻成為宴會入面嘅「人肉布景板」。
就現場所見，約有近一百名賓客爭住同嘉玲合照，事後嘉玲話：「應付閃唔停嘅閃光燈，我嘅眼都閃到好攰同眼花。」
嘉玲呢次留喺台灣前後四日，佢除咗出席兩個宣傳活動，重幫雜誌影靚相。
當做完晒嘢，嘉玲更偷得浮生半日閒到處品嘗美食，佢曾猶豫去唔去謝霆鋒早前同記者發生過衝突嘅太和殿食麻辣火鍋，而最後嘉玲都同友人喺火鍋店大快朵頤。
內地中央電視台喺北京舉行嘅MTV音樂盛典，出席嘅歌手來自中、港、台。其中香港嘅梅艷芳就獲頒榮譽大獎，大會為咗隆重其事，重安排阿梅唱壓軸。而黎明就獲頒亞洲年度大獎。一對緋聞男女許志安、鄭秀文分別攞到香港區嘅最佳男、女歌手獎。
台灣天后張惠妹（阿妹）嘅新專輯《發燒》，將喺下個月推出，阿妹為咗宣傳大碟內其中一首新歌《狠角色》，會透過台灣四個通訊商，一齊播放呢首新歌外，佢嘅歌迷亦可以利用手提電話去聽阿妹嘅新歌，名副其實係去到邊聽到邊。
肥姐沈殿霞喺新加坡拍英語劇集《肥肥駕到》，日前肥姐喺錄音室錄主題曲，佢個女欣宜就喺現場做「指導」，肥姐重講笑咁話𠵱家要聽個女嘅說話，因為欣宜喺加拿大讀書，英文發音比自己好，所以要聽老師講嘢。肥姐重話自己唔係歌星，所以大家對佢唔會要求太高，但聽完之後，大家都話佢唱得唔錯。
台灣人氣組合F4中嘅成員吳建豪，下個月會推出個人專輯，佢呢排忙於為MV選女角。
吳建豪聽日會喺台北、台中同台南三地舉行簽名會，並順道宣傳新碟。歌迷為咗見偶像，佢哋呢幾日已經開始喺唱片店門外排隊。
陳曉東、秦海璐主演嘅《停不了的愛》已經開始喺大陸做宣傳，好似上海、廣州、瀋陽，而噚日就去咗深圳，因為馬不停蹄嘅關係，秦海璐辛苦到病咗，而陳曉東就鬼死咁精神，佢重話：「我都唔知幾精神，完全唔攰，重可以夜夜笙歌。」
樂壇新人關心妍下個月三十號會喺灣仔會展參加「世界傑出華人鋼琴家滙聚香港演奏會」，佢同該演奏會嘅總監Eden日前相約喺灣仔君悅食飯，商量工作演出事宜，點知俾記者撞見。關心妍話非常擔心呢啲新聞傳出後會惹嚟緋聞，所以佢立即澄清。
韓國樂隊JTL噚晚去北京出席第四屆「2002CCTV——MTV音樂盛典」，三位成員李在元、張佑赫同安勝浩都同時喺機場接受傳媒訪問，佢哋重帶埋隻狗嚟。有啲歌迷因為去機場接機撲個空，所以好失望，重即時喊咗出嚟。