新萬泰（433）噚日出咗個通告，小初睇完之後覺得有多少奇怪，所以想同大家研究吓。
話說新萬泰將以每股0.30元，發行2.32億股新股畀一間上海公司，作為支付一個地產項目嘅開發工程費用。呢批新股接近7000萬元，佔已擴大股本8.38%咁多。
小初唔明，既然係工程費用，照計有唔少錢要使，冇理由對方揸住批貨唔沽作長期投資。若然人哋真係要沽貨，究竟係交由炒家有秩序散貨，抑或就咁掟出街？公司又冇講對方究竟會點處理批股票，搞到小初鬼咁多聯想。
另外，由外資玩開嘅勵晶太平洋（575），噚日失驚無神炒高14.8％，收31仙，雖然成交只得百零萬元，但就見到成班外資行列開陣型。
經紀陳話，呢隻股不時傳出賣盤，但聽講唔容易成事，重有係當股價插落30仙樓下一排，就會有人推返上去，但去到30仙樓上，又會行人止步。
慕容小初