期待已久嘅美股大反彈，前晚終於出現，杜指躍升近5百點，可惜港股高開低收，恒指倒跌87點收場，認真肉酸。不過，若有幸喺低位揸咗滙豐Put輪或恒指Put輪，則不妨先計賺錢數，食咗胡先。
滙豐（005）昨日先高後低，收84.25元，冇升跌。但係昨日推介嘅滙豐Put輪9234卻大升28%，收53仙，升11.5仙，即係當正股跌咗1.15元嚟炒。另一件滙豐淡友輪9366重誇張，輪價由1.05元彈上1.20元，升15仙，即係預咗正股要跌1.5元。
由於滙豐Put輪普遍升定先，即使正股真係跌落去，繼續揸住啲Put輪未必好着數，倒不如先行獲利，飲茶睇戲好過。兩隻熱門恒指Put輪9205同9287分別跳升24%同16%，溢價均見擴闊而槓桿率則縮減，反映輪價升過咗龍，不妨先睇位落車。
恒指跌到去9800水平，照計開始有支持，如果昨晚美股回吐不大甚至續升，不妨小注短炒恒指Call輪9174，呢件6.8%溢價，39.2倍槓桿率，下月尾到期，數據稍勝另一熱門恒指Call輪9201。
章 盛