美股周三大升近500點，亞洲股市竟然未能受惠，香港同日本股市高開低收，倒跌收場，人心之虛，可見一斑。
美股大升且接近高收，但冇人認為係好現象，反而先天下之憂而憂，諗住美股彈完又會再散過。恒指噚日高開，但個勢唔係好勁，最高升唔夠200點，已令人覺得不妙，果然，中段之後就反覆走低，午後更反升為跌，萬點關得而復失，結果低收9884，跌87點，期指低水54點。噚日中銀（2388）掛牌，交投活躍，有29億元，令大市成交增至106億元。
中銀表現令人失望，早盤雖有大行「護價」，在8.5至8.4元間頂咗一陣，但大中小戶沽盤有如洪峯掩至，大行頂無可頂，卒之收工。中銀最低見8.0元，收8.1元，喺呢個水平，相信有排消化。
大市由高位回落，跌逾2000點，近日走勢亦極度反覆，但新醫藥（8085）就好硬淨，從低位1.08元反彈上1.15元水平，守得好穩，相信整固之後，短線有力向上市後1.3元的高位挑戰。
新醫藥經銷中成藥及保健產品，上市後，全力拓展世界市場，初步已在日本成立分公司新醫藥商事，以及在杭州開設專門店。美洲市場方面，集團已與加拿大健康食品公司Agapi達成協議，分銷8種保健產品，另與美國大型保健產品連鎖店的洽商，亦已進入最後階段，短期內可落實，預期美洲業務可在下一年度開始提供可觀收益。
本港方面，集團已計劃短期內推出多種保健產品，並會透過大連鎖集團和藥房銷售。保健市場潛力極大，新產品推出後，新醫藥業績勢會以倍計上升。另外，集團亦洽購生物製藥及生物科技項目，拓展盈利新來源。
去年度（02年3月止），新醫藥盈利215萬元，現年度料可急升至2000萬元，前景看好，現水平吸入，目標1.3元至1.5元，跌破1.08元止蝕。
郭兆誠