馬主H間公司，以前替一間網上書店做過顧問，後來合約完畢，網上書店嘅行政總裁要搵馬主H做撰稿顧問，馬主H覺得係小生意，唔肯做，介紹電腦J去搞，電腦J勝在寫稿快，對資訊科技好熟，好快就同行政總裁L傾得埋。後來某報嘅投資周刊搵總裁L寫稿，總裁L為咗替網上書店做公關，應承咗；寫稿流程就係：總裁L與電腦J傾內容，講要點，電腦J執筆，篇稿交畀馬主H望過先至送去投資周刊，至於寫稿費用就由馬主H間公司開單問網上書店收，馬主H再同電腦J計數，兩人合作慣熟，合作愉快，每個月網上書店未找數，馬主H已經磅咗水畀電腦J。如此做法，一直相安無事，點知網上書店突然宣佈破產關門，總裁L鬆人，一切資產負債由liquidator管理，咁就大鑊。
原來總裁L鬆人之前，有好多寫稿單有簽到（其實可能簽咗都冇錢畀），欠落馬主H間公司三四萬銀，破產管理員要馬主H提供寫稿合約，以資證明。
馬主H惟有大嘆倒霉，因為嗰陣以為係小數目兼夾短期交易啫，總裁L又做事爽快，以為可以每個月「見單即付」，簽乜鬼嘢寫稿合約吖，點知因為咁就俾破產管理員搵到個藉口賴債，真係氣都頂埋，好彩三四萬銀唔算係乜嘢，當養馬畀多個零月費用便是。
總之呢個世界要帶眼識人，口講無憑，講錢唔白紙黑字，好易做老襯。