港股單日轉向只係轉咗1日，又嚟插過，恒指1萬點關正式失守，收報9971，且看9600至9800支持區能否頂住。
美股弱得好交關，前晚唔只冇反彈，重要插過，杜指雖然只跌1%，但納指就散逾4%。兩大銀行集團花旗同摩根大通牽涉入安然醜聞，股價插水，市值兩日蒸發540億美元，其他銀行股難免受拖累，包括滙豐（005）。
滙豐昨日急跌3元，收報84.25元。睇番張圖，滙豐由去年11月至今，似乎營造大型雙頂，而頸線就喺84元左右，若見跌穿此位，可以追買滙豐Put輪。
滙豐Put輪當中，9234係炒友對象，成交旺，買賣開價亦貼，上落車隨時都得。9234現價0.415元，10月21日到期，溢價10%，槓桿率20.3倍，數據可以接受。
搏殺格嘅可以揀9034，呢件末日輪下月2號到期，接近平水，19倍槓桿率，只宜蚊型注碼當買大細。想保守啲可買9366，溢價5.6%，槓桿率只係8倍，12月初至到期，上落冇前面兩件咁大。
章 盛