港股繼續受外圍拖累，獲萬千市民捧場嘅中銀香港（2388）今日掛牌，表現如何真係唔敢講，希望可以守住白表嘅認購價，話晒都係大家嘅辛苦錢。
其實除咗市民嘅血汗錢之外，好多炒家同大莊家，一早預備咗錢做嘢，但受大市氣氛唔就影響，真係唔知點收科？
好似金威（910）剛剛配售一批認股權證，集資3990萬元，行使價0.49元，準備在下周五掛牌。聽經紀陳講，原本炒家諗住批輪一掛牌，金威就會炒鋪勁，所以近排股價企得好硬，但噚日受大市拖累，股價都跌咗4.2%，收46仙。
件事令小初諗起上海策略置地（164），自從隻股有批輪掛咗牌後，股價一度回升，噚日重企硬喺0.22元附近，但睇成交，無論正股同輪都唔慌散得到幾多貨。經紀陳話，𠵱家咁嘅市況，完全係考驗莊家嘅實力，睇下佢哋可以頂成點。
慕容小初