新聞處顧問麥奇連提前幾個月退休，離港去澳洲定居，FCC特別為佢搞咗一個歡送酒會，喺上星期五下午六時幾舉行。事先FCC發咗一份通告畀會員，話到時有肥彭（彭定康）利用衞星電話向麥奇連祝酒，但事前唔畀麥奇連知，畀佢一個驚喜喎。呢啲驚喜，難度真高，要所有記者唔好知會麥奇連，都唔知係唔係開玩笑。
左丁山因事先有約，趕唔切去FCC。事後老友講番，到場嘅全部係外國人，只有張敏儀同呢一位係華人，新聞處啲高官一個都冇到，據老友猜測，一來人走了茶就涼，二來事先知道肥彭會越洋祝酒，新聞處啲現役官員重唔急急與麥奇連保持距離咩，話知佢以前幾有影響力吖。
老友話，麥奇連退休，最傷嘅就係曾蔭權，皆因陳太自肥彭手上接過麥奇連做演講稿寫手，再使用麥奇連嘅國際記者關係網，喺國際上聲名甚佳。陳太走咗之後，曾蔭權照辦煮碗，亦十分掂。據講麥奇連退休後，新聞處再無英文文膽，曾司長仍會再利用電郵聘用麥奇連做「件工」，以維持水平，但麥奇連同國際傳媒打咗十幾年交道，搞得好掂，呢啲關係就唔係可以用電郵嚟維繫咯。至於以後點搞，就有待啲高官去度掂佢，以後香港的外籍高官愈嚟愈少，如何找適當接班人，係一個唔大唔小嘅問題。