近日謝霆鋒、張栢芝、陳小春等先後被狗仔隊滋擾，引起演藝人協會關注，協會計劃研究藝人在公餘時間實行「封嘴行動」，黃子華和吳君如前晚出席新片《狗狗震》的首映禮時，都對「封嘴行動」發表意見，君如表示藝人私生活要檢點。
吳君如和黃子華配音的新片《狗狗震》，前晚於旺角新世紀廣場舉行首映，名模Rosemary、吳彥祖緋聞女友Liza、司馬燕一家四口、黎燕珊和其子女等都有前往睇戲。
演藝人協會近日關注到謝霆鋒、陳小春、張栢芝和張國榮被狗仔隊追訪，協會下周將開會研究能否保護藝人在公餘時間不接受採訪和拍照的權利。對於有關「封嘴行動」，子華和君如都有不同的見解。子華說：「我都試過有新聞上港聞頭條，『封嘴行動』未必幫到件事，平時狗仔隊採訪都唔使問料。而且尺度好難界定，唔單止公眾人物，普通巿民都要私人空間。」
而君如則表示：「做藝人要檢點私生活，呢個趨勢冇辦法。發哥（周潤發）都試過喺九龍城被人影相，但都冇嘢。我覺得藝人可以唔去嗰啲冇必要嘅地方同埋蒲少啲。我平時俾人影相，只要唔騷擾到我就冇所謂。」
此外，劉德華昨日接受港台訪問時說：「政府立例都有少少奇怪，政府真係無乜辦法，我真係唔明，我覺得傳媒同藝人應該好好哋坐低傾，試過有次開演唱會，有記者扮我歌迷，坐喺我屋企人隔籬，重問我屋企人，你媳婦點呀！我都唔知點解係咁，態度好重要，大家可以舒服啲。」
而曾志偉昨日出席新片開鏡時表示：「要藝人喺公餘時間唔接受訪問呢個建議係比較困難嘅事，九五年藝人封嘴一事都處理得唔好，我覺得唔應該全面性封殺。」
至於身兼香港演藝人協會執委和秘書長的張權昨日來電說：「我哋個會唔係要同傳媒對抗，至於話同特首反映，其實重未行動。上個禮拜只係因為有執委攞近期幾單藝人同傳媒發生衝突嘅事件嚟講，大家先會關注到，並唔係藝人正式嚟投訴。」
採訪：魯萍
攝影：何國豪