沙田區噚日有兩個豪宅盤撞期開記者會，大家都要搞啲新意思爭取曝光，好似火炭半山伯爵堡，記者去沙田搭專車。車到現場門口，突然有四個身穿中古時代宮廷服裝嘅俊男美女埋嚟，迎接大家去會場。
蘭西查得呢兩對模特兒，一對係英法籍嘅組合，另一對嚟自本地，唔怪得着乜似乜！公關解釋，呢個安排，係想大家感受吓物業嘅城堡feel，睇吓個盤嘅外形，又幾似噃！
呢場show嘅主角當然係發展商，佢用大鎖匙打開一座城堡模型，砰一聲，好似開炮咁，但見漫天紙碎飛揚，果然夠特別。
伯爵堡示範單位設有地庫，用作影音室。但其他單位可以點用，就要睇買家嘅創意！
另外，發展商又向每位行家送羽毛筆，充滿古代氣息，不過蘭西𠵱家要用電腦打字，冇乜機會揸筆，真係可惜！
附近沙田皓朗山莊要成五點至開記者會，代理為怕記者匆匆走返報館，所以預備專車喺伯爵堡門口接記者。不過，當扺達現場時，發展商搞嘅皓朗盃桌球賽已經完咗，由美聯助理營業董事黎偉強奪得冠軍，利嘉閣分區經理楊振宗就攞到亞軍。發展商請得藝人吳文忻頒獎，大家眼前一亮。
吳文忻話佢喺加拿大同父母一齊住嘅時候，都係住屋仔，所以對個盤幾有好感。雖然好想買番間，但係唔夠錢，重話會畀心機賺錢買樓。咁有決心，好易達成願望啫。
𠵱家住宅供應多，所以舊樓唔易有承接，但跑馬地區嘅舊樓原來都幾多人搵，而且銀碼唔細，動輒五六百萬。香港置業跑馬地分行經理屠淑明對蘭西講，佢哋啱啱促成咗蟠龍道16號1樓成交，單位樓齡44年，2000方呎，成交價670萬元，每呎都要成3350蚊。呢個單位係公務員合作社樓，所以業主要補二百萬地價先賣得。
個盤實用率逾八成半，樓底高，有露台同工作間，但因樓齡高，銀行只做五六成按揭。今次個買家一次過畀晒錢買嚟投資，果然夠實力。
區內呢類高齡物業市場放盤唔夠十個。3月份有一個三千七百呎複式單位賣咗，成交價要九百九十萬。
幾年前，政府已經話要將油麻地戲院、果欄同紅磚屋等古迹，大力配合旅遊發展，但只聞樓梯響，冇晒下文。有區議員忍唔住，準備今日喺區議會提出一啲意見畀政府。
因為前水警總部改作商業用途，油尖旺文化藝術協會被迫遷出尖沙嘴，佢建議不如搬入紅磚屋，可以吸引旅客到油麻地遊覽。
油麻地戲院則可以改做中國文化藝術中心，搞不同地方的戲劇表演，如粵劇、京劇等，又可以起個博物館，介紹該區嘅演變！
但佢竟然冇提到果欄會點搞。
蘭西噚日喺藍田地鐵站，見到人頭湧湧，走埋去睇吓發生乜事，會唔會有大新聞，原來係長實喺度擺攤位，推廣長沙灣泓景臺，擺咗個大模型喺度畀人睇，同時又有專人派發宣傳單張。
蘭西打探得悉，今次係長實巡迴展覽嘅第一站，展期到今個禮拜日，之後就移師到葵芳地鐵站。咁咪同新地下個禮拜一開放嘅珀麗灣示範單位打對台。
展覽共有5站，都係揀啲人流旺嘅地鐵站。原本地鐵係按日計租，但長實就話因為要做巡迴，所以要求用一個套餐計，實收幾多就唔肯講。
宣傳行動係為泓景臺二期開售鋪路，因為紅磡家居庭嘅一期示範單位已經拆咗，用嚟起第二期嘅示範單位。聽長實嘅人講，泓景臺二期今年只會推出第2座，共696個單位。
連大發展商長實都要搞巡迴展覽推介樓盤，其他發展商售樓部阿頭要諗諗計嘞！
蘭西
電郵地址：