港股周二偷步升203點，成個單日轉向咁款，唔少人拍手叫好，點知美股周二晚先升後跌，港股噚日連本帶利跌番夠本，恒指急挫341點，收9971。
港股噚日成交大增至91億元，反映投資者信心進一步削弱，沽貨離場，但淡友竟傳到光大控股（165）出售中移動（941），趙飛雲就唔明點解要出到呢招，唔通已經冇其他壞消息可用？
杜指12個交易日跌咗11日，跌咗1677點，跌幅17.8%，9RSI跌至13.3，實在非常超賣，美股隨時出現大反彈，帶動港股急升，因此大趨勢雖然向淡，但揸Put輪短炒要轉身快，過夜不宜太重貨。
噚日滙豐（005）跌3元，收84.25元，成交達30億元，沽空成交近6億，擺明係淡友力質對象，但穆迪調高滙豐長期評級，唔知對股價會唔會有支持？早排提過唔少散戶喺87元附近曾排起血肉長城力托滙豐，通常出現呢種現象股價係未見底。如今滙豐稍微跌穿頸線84.50元，短期如果唔能夠抽番上去企穩，下面無險可守，望落去相當牙煙。
阿 虎