我求大俠一早收晒風，話啱啱做完「波蘿蓋」手術冇耐嘅「加拿大飛人」卡達，講明今次佢嘅「神州之旅」唔會當眾show料、表演佢最拿手的入樽絕技，點知原來全部都係流料！累我求大俠虛驚一場。
卡達噚日剛喺京城大顯身手，當眾表演高難度嘅三百六十度轉身同埋風車轉入樽絕技，睇到班國內球迷拍爛手掌，證明呢位NBA「入樽王」嘅膝傷已經大致康復嘞；更值得高興嘅係廣大嘅香港球迷，喺卡達今日中午訪港時，有極大機會喺灣仔修頓室內場一睹「加拿大飛人」入樽絕技。
不過就算冇飛入場都唔緊要，因為《蘋果日報》今日會全程直擊卡達嘅訪港之旅，而且重會獨家專訪卡達，各位卡達fans記得留意聽日體育版啦！
韋斯咸中場祖高爾玩完金毛Look後，最近又玩字母頭，將髮型剪成佢英文名頭一個英文字母「J」，重染成紅色㖭。唔知形象一向百變嘅碧咸，又會唔會剪番個呢？但計我求大俠話，碧咸要剪都唔係咁易，事關佢個名「D」（David）同個姓「B」（Beckham）都比祖高爾嘅J字複雜，所以要剪成字母頭，真係要搵佢個髮型師嚟搞。
門將李察胡禮呢舖真係決心大！噚晚啱啱決定減薪（據講減咗成五千鎊）加盟愛華頓，有人會覺得佢根本唔需要咁博，等阿仙奴老將施文來屆退休後，就可以做兵工廠一號門將，但可能佢認為雲格唔能夠兌現上屆佢加盟時，畀佢踢嘅承諾，所以決心離開。雲格𠵱家剩番施文同牛奶嘴泰萊把關，睇怕要搵門將囉。
咪以為球員影咗大合照，就一定可以留隊，好似德國前鋒贊卡咁，佢啱啱先喺禮拜二影拜仁