好多人都有誤解，以為要玩最新AV產品，就一定迫住捱貴貨！最近有AV店搞咗個DVD機套餐優惠計劃，全部本星期第一手新到DVD機，有型仔薄身機，亦有功能又強又齊，都一律冧價狂減！趁暑期工首期出糧時間快到，想執平機係時候。
記者：朱崇德 攝影：陳盛臣、朱崇德
ImageGirl：Sarah
套餐1
呢排AV場最具人氣DVD機，應該都係呢部PanasonicDVD-XV10，機身厚度僅為52mm，差唔多等於一粒2A電芯嘅高度，再加埋係日本製造，質量上當然有信心過國產或東南亞貨色啦！但最「離譜」係賣價唔貴，新機價都係$1,780，絕對係近期DVD機至筍之選。
同呢部DVD機襯埋一套嘅SA-XR10，今個星期亦搶閘到港！SA-XR10係一部內置5.1聲道功能嘅擴音器，基本DOLBYDIGITAL、dts同PROLOGICII佢都可以全部玩齊！不過最強賣點係機身夠薄同外貌夠型，需知現時市場上薄身擴音機的確唔多，再加埋又係日製，兩機套餐價為$4,490，抵買感覺更濃！
記者意見
呢部SA-XR10薄身擴音機，好多大行單機都做緊$3,980高價，事關咁型咁薄，實在唔憂賣！$4,490套餐價，真係勁抵。
套餐2
LG本星期推出嘅DK5946PT，功能一味以強取勝，機身內置有dts及AC-3雙解功能，可以玩到完美5.1聲道環迴立體聲效果，而且加入埋PROGRESSIVESCAN功能，逐行掃描嘅最大威力，當然係令DVD畫面更清晰、更穩定啦！重加入埋卡拉OK同MP3CD播放功能，真係差唔多講得出嘅視聽娛樂，都俾呢部機玩齊！
LG呢部DVD機同TIMBREDS1504L喇叭系統做套餐價！DS1504L係一套5.1聲道喇叭系統，總輸出功率約200W，一般百餘呎的香港客廳，應該都好夠玩！不過最強賣點係前置同後置的2組喇叭，使用了座地式設計，因此令喇叭放置的高度與一般人坐下來的高度相若，所以聽起上嚟音色會更佳。
記者意見
韓產LG嘅DVD機一向質量唔錯，再加上功能咁齊真係幾抵玩，最鍾意套5.1喇叭用座地式設計，需知平平哋買一支座地喇叭腳，都要百幾蚊啦！所以買呢個套餐可以為你慳番筆。
同為韓國品牌嘅DAEWOO，今個星期都有部DHC-XD300到場，DVD機功能亦都係乜都有嗰隻！dts加AC-3雙解碼，配合上5個輸出功率達30W的小型衞星喇叭，可以輕易做到環迴立體聲效果。對應光碟格式亦算強，一般DVD、VCD、SVCD、AudioCD同MP3CD都可以直讀冇問題！不過筆者最鍾意佢有一組視頻輸入（俗稱紅黃白線）同FM天線設計，駁電視遊戲機或其他音響系統，可以當佢半部擴音機咁用，而且機身同喇叭設計非常慳位，嫌之前介紹嘅座地喇叭太阻地方！咁呢套實啱使！
呢部中日合作嘅SANSUIDV-X3303P（即係日本品牌、中國製造），都係本周DVD機最新貨！唔好睇佢其貌不揚，原來竟然內置有逐行掃描（PROGRESSIVESCAN）同dts、AC-3雙解碼功能，所以聲、畫兩方面表現都好突出！接駁介面除咗有齊一般色差、光纖、同軸、視頻同S端子之外，竟然連電腦顯示屏常用嘅VGA頭都加埋落去！如果想放喺房用，DV-X3303P駁芒用就至啱使。
店舖資料
華仁會電器
地址：旺角花園街75?7號花園商業大廈5?樓全層
電話：23980280