蒙嘉慧（YoYo）噚日朝早去黃竹坑駕駛學院考電單車牌，YoYo向來身形都偏瘦，噚日望落重瘦咗㖭，真係同張栢芝有得揮。今次係YoYo第二次考牌，可惜「衰收尾」再次「肥佬」，YoYo唔開心到頭耷耷嘴扁扁，當記者問佢結果，佢就忍唔住指住其他考員大叫：「頭先邊個揸xxxx嘅車㗎？」
YoYo話：「唉！上次衰擰轉頭唔夠快，所以今次特登換個輕啲嘅頭盔。而今次考嘅路線容易啲，我都開得好慢，點知臨尾有架私家車喺我面前停車，我一停車右腳落地就肥咗，話我失平衡，不過已經比上次進步。」
已決定補鐘再考嘅YoYo，話等成功先至公布，佢話：「考牌好大壓力，怕有記者影相，而且考官都會執得特別嚴格，我都係考到牌先通知大家。」
亞視女藝員袁潔儀因為喉嚨生繭，日前入咗醫院做割除手術。馮仁昭同袁潔儀通電話，佢話：「我都冇留院，做完手術休息咗一陣就離開。我會休息一排，初初做完手術嗰陣，我日日出街都帶住紙筆，方便同朋友溝通。」
袁潔儀九月約滿亞視，但佢話重未開始傾新約。
陳浩民去咗台灣拍劇，佢同林志穎係同一間經理人公司，今次重一齊合作拍電視劇《偷偷愛上你》。佢兩個首次合作，林志穎梗係要一盡地主之誼招呼吓陳浩民啦，佢哋重約埋鍾漢良一齊打籃球；不過陳浩民就俾鍾漢良寸，話一睇佢個款就知佢打籃球「渣」喎。
黃伊汶噚日出席西貢舉行嘅夏令營活動時，話朝早同細佬喺淺水灣滑水之後，返市區途中遇見一個中年男人倒卧路邊，佢於是即刻打電話報警。
黃伊汶話：「我係第一次打九九九，而且咁大個女都未遇過呢啲情景，感覺好似救咗人一命。」
關心妍噚日同李彩樺等，出席喺西貢舉行嘅夏令營活動。關心妍話自己四年級時，亦曾參加呢類宿營活動，但當時佢係一個大肥妹，而營地提供嘅晚餐份量唔夠飽，於是佢要偷出營地買嘢食，關心妍話：「我同一個朋友偷去士多買餐蛋麵，但俾阿sir發現，最終要罰抄。」
明星版《一觸即發》噚日錄影，請咗一班歌手包括陳文媛同李蘢怡等出席，最後由李蘢怡勝出，奪得兩萬零五百元獎金同十一萬獎品，而獎金將會全數撥捐香港影視明星體育協會慈善基金。黃子華重特別公布《洛神》版《一觸即發》嘅收視最高有三十三點（約二百一十七萬觀眾）。
百事可樂搞咗個音樂會請咗F4演出，班fans知道今個禮拜六（二十七號）先開始派飛，但為咗排頭位，有fans喺十二號已經開始等，其間重傳出話有位賣。不過問過班fans，佢哋都只係話聽過，而冇見過有人兜售，相信係以訛傳訛居多。
早排宣萱喺無綫發生連環失竊，噚日有周刊重提此事，重話宣萱當日要求一位有嫌疑嘅女化妝師剝光豬搜身，宣萱噚日就話件事已經交畀警方處理，自己唔想講太多，宣萱重話對呢篇過氣報道只係得啖笑，總之有人想令佢唔開心，佢會學鍾鎮濤話齋，信天有眼。