立法會議員中，有唔少唱K嘅「攝鐵手」，即係拎住支咪就唔捨得放嗰隻。例如黃宏發同阿涂等，但八方噚日就有新發現，原來李家祥都好鬼犀利。
早餐派噚晚搞咗個聯歡會，同一大班記者唱K聯誼，可能班行家怕羞或者掛住做嘢，Eric一於做駐場歌手，大唱中西歌曲，唱完《StreetofLondon》，又唱《紫玉釵》。佢重同埋老婆阿囡合唱一曲《Words》，認真溫馨。
馬逢國同劉炳章都唔執輸，同樣帶埋老婆嚟湊熱鬧，阿馬重唱一首《月亮代表我的心》，冧人又冧老婆。向來喺立法會唔多聲嘅石禮謙，原來亦好鬼得，見佢好輕佻咁唱《HelloDolly》，呂明華同亞視女記者范姐就齊齊撲上去送花畀佢，佢就頭戴鮮花表演一番。最後，大班人齊唱一曲《明天會更好》收工。
講開呢個場，都好有睇頭，身為恒生董事嘅Eric租咗恒生頂樓個博愛堂，八方打聽，噚晚每個人要三百蚊，佢哋預咗有六十人來，費用就由早餐七子，加埋馬逢國劉炳章夾錢，大概一人科水二千蚊，抵玩啦！
（圖）李家祥噚晚同老婆、阿女合唱一曲，十分溫馨。
傳真︰2623-9278
電郵︰