美股周二持續下挫，港股前日挾完淡倉後，噚日就殺好倉，恒指一度挫逾400點，跌埋前日應該出現嘅跌幅，恒指收市報9971，跌341點。滙豐（005）繼續被拋售，有傳聞話JP摩根大通要減磅套現，要在全球沽出投資組合，滙豐亦被力沽，成交金額罕有高逾30億元。
阿虎初初重以為係咪有基金換馬買入中銀香港（2388）及其他中資股，不過其他中資股同樣被拋售，中銀香港暗盤價亦冇突破，傳聞成交過每股8.30元。
由於散戶認購價每股8.075元，加上定價後外圍市況及港股都跌咗唔少，相信會有唔少散戶沽貨離場，所以有芬佬預期，中銀香港隨時跌破招股定價8.50元，若能貼近散戶認購價8.075元水平收市，已經算唔錯。
Cookie話，照計中銀香港首日上市，中資通常都會入市贈興，港股隨時會反彈。不過，若真係有JP摩根大通呢類大行要沽貨，咁做咪益咗佢哋高價套現。
媒體伯樂（8072）噚日一度急挫逾23%，低見0.46元，收0.485元。傳聞有大行斬人客倉，但成交只得521萬元，呢個倉都唔慌大得去邊，不過此股成交一向唔多，若孖展客冇錢補孖展，斬起倉上嚟，股價跌幅會相當驚人。
由於近期唔少股仔爆煲，二三線股差不多已經冇咩人理會，更加冇人會接貨，炒家亦懶得維持秩序，任由股價freefall，其中安利時（339）最能反映呢種現象，股價大跌34%，收3.1仙，成交只得8.73萬元。
阿 虎