美股杜指周一再挫逾200點，但港股不跌反升，同亞洲區內股市一齊升。ｅ莉莎話，家陣投資者關注嘅已經唔係美股，而係美元，噚日美元企穩兼反彈，一定程度上反映投資者認為美元資產見底，雖然資金暫時只會流入美債，但同時亦會在股市中伺機執平貨，所以唔能夠睇得太淡。
創維數碼（751）公布全年業績轉虧為盈，賺6224萬元，重派息3仙，成績都叫做唔錯，但一公布完業績，下午即遭拋售，收0.77元，大挫12.5％，成交4410萬元。
ｉ師傅話，市場傳出有匿名信投訴創維涉及20億元稅務問題，可能令公司要作出大幅撥備。此股噚日成交頗大，似係有大戶洗倉，一般而言，芬佬唔會輕易受到傳聞左右，換言之，創維今次可能係被人刻意借傳聞拋售，但用意何在，連ｉ師傅都話唔知。
長江生命科技（8222）噚日終於首度破底，低見1.92元，上午沽壓唔輕，連保薦人所羅門掛出嘅買盤亦一度被質清，但最後股價Mark返上2元收市，據聞尾市頂價者都係超人嘅御用經紀。
海爾中建（1169）噚日反彈4%，收0.13元。此股由0.30元樓上插水，低見0.11元，累積跌幅唔細，難怪有人話可以撈底。不過黑客話，此股早前出現股東爭拗，到𠵱家仍未平息，可能低處未算低。
東航（670）與南航（1055）噚日雙翼齊飛，前者升6.6%，後者升11.8%，成交相當大，莫非又有併購消息？
Cookie話，芬佬主要炒油價下跌，有利兩航經營環境，冇特別原因。
阿虎