今年住宅租金跌幅大過樓價，時不時見到平租個案。屯門地膽代理行祥益地產，最近就做咗一單可說平通屯門嘅生意，月租全包二千六百蚊。
祥益美樂分行經理潘鈺恒對蘭西講，個單位係利寶大廈低層，344方呎，租值偏低。
利寶大廈位於屯門清河坊，係單幢樓，樓齡二十年，一梯八伙，實用率七成，大堂同走廊位設計較差，單位又唔算企理，業主放咗個半月終於租出，租客就係貪佢平先肯租。
祥益做成呢個盤，都係收到半個月佣金，只得千三蚊，真係可以講幾乎得個做字。聽講啲大行就唔肯做，所以千方百計去推啲客。
𠵱家利寶大廈有八九個單位放租，全包月租叫價三千至三千二。同區萬寶大廈同麗寶大廈，單位面積都差唔多，月租叫價相近，成交的最多都係三千蚊。由於租金平，所以幾座大廈嘅租市都活躍。
利寶大廈近置樂花園，樓下有商場，附近有街市，有通宵小巴去旺角同佐敦，行十分鐘就到市中心吉之島，都算幾方便。不過，潘鈺恒話，市中心交通重方便，所以有能力嘅租客，一般會優先揀市中心，好似屯門市廣場一個425方呎單位，全包月租就要成三千四百蚊。
住宅租金假如再跌落去，睇怕又有人要上街示威，不過唔係啲私樓業主，而係公屋居民，抗議私樓租金平過公屋。
經濟唔好，慳得就慳，所以賣平嘢嘅舖頭特別好生意。恒基集團嘅千色百貨都唔執輸，最近喺將軍澳新都城商場千色百貨開咗檔「$10選之樂」，賣嘅貨品有家庭用品、文具、化妝品同食品，重講明全部由日本返嚟，售價一律10蚊雞。
上年11月，日本10蚊店Kyun喺銅鑼灣崇光地庫開業，連續六日出現人龍。上個月底，吉之島又喺銅鑼灣搞「十元廣場」，平均每日有成千五、二千人幫襯。四叔李兆基數口精明，即刻搞埋一份，證明賣平嘢有市場，睇嚟同行遇上勁敵，要諗計先得嘞！
過去發展商旗下商場會不斷重整租戶組合，引入高檔品牌，取代中低檔商戶，但𠵱家風水輪流轉，商場有賣平價貨嘅商戶，反而可以吸引更多人流，發展商使唔使再重整租務策略呢？
城中熱門話題係阿B鍾鎮濤破產事件，佢之所以搞成咁，都因為炒樓之故。不過，同佢一樣命運嘅人有好多，名下單位最後淪為銀主盤。利嘉閣數據顯示，上個月銀主放盤量進一步增加，累積到3834個，係近一年嚟新高，而成交量就減少咗，反映銀主盤去唔到貨。
喺6月錄得嘅銀主盤成交只有145宗，比5月跌咗5個百分點，係去年10月以嚟最少銀主盤成交嘅月份。一啲熱門屋苑，好似鰂魚涌康怡花園，有近30個銀主盤，但6月就一個都賣唔出。
市場有一啲投資者專吼呢啲銀主單位，用低價買入，略為裝修或甚至即時再放售，賺番約一成利潤。不過，蘭西就奉勸一般市民，唔好立亂去買嚟炒，若果賣唔出，搞到變番做銀主盤就弊嘞。
賣樓搞宣傳，當然唔想同行家撞期，以免攤薄啲報道，發展商間中會問蘭西，其他發展商幾時開記者會。但有時都會撞到正。好似今日咁，九肚山皓朗山莊同沙田半山伯爵堡撞日搞宣傳活動。
皓朗山莊發展商今日邀請六大代理的董事級人馬舉行桌球比賽，冠軍除可攞到皓朗盃外，重可以贏得雙人地中海旅遊套票。同場有市場關心嘅最新銷情。發展商重話請到藝人吳文忻嚟壓陣㖭。
共有32伙嘅皓朗山莊，聽講噚日賣咗兩間排屋，至今共售出12伙。
至於由晶苑集團發展嘅伯爵堡，有六座獨立屋，有獨立門牌，夠晒尊貴。今次係首次開放畀記者參觀。
蘭西
電郵地址：