香港回歸五年失去好多嘢，好彩重有創作自由。康文署最近贊助同主辦嘅《天路歷程某五站．五年欠打》劇場表演，擺明車馬諷刺政府，宣傳字句話：「過去五年錯過又錯，再來五年又如何」，幾夠膽識。
最後一次導演該劇嘅樹寧好坦白咁話，回歸五年來劇場嘅題材來來去去都係失業、經濟低迷、綜援等問題，但就未有解決過，睇怕未來五年都唔慌有突破。佢惟有等第三屆特首上任，再用呢個形式同觀眾見面。
諷刺完特首，佢哋連問責高官都挑戰。劇中的一大班演員，演出一幕幕溫馨感人嘅「獅子山下」街坊街里睦鄰友愛場面，跟住突然間有人大聲叫：「假嘅！清醒啲啦，唔好再懷緬過去！」跟住再演出一幕幕殘酷嘅現實。
樹寧話聽到班高官成日講：「自己細個瞓板間房，又點又點」，但就唔理點解今時今日都有人咁窮，所以先忍唔住點醒吓港人，咪成日懷緬過去。劇場由七月二十六日至二十八日晚於西灣河文娛中心上演。
傳真︰2623-9278
電郵︰