最近外國有消息傳出，謂福士車廠將於2003年9月舉行嘅法蘭克福車展上，展出新一代Passat車系，新車除造型變得年輕富吸引力外，多個引擎配搭亦能滿足不同用家嘅需要。
新Passat嘅底盤及引擎配搭，將會以新Golf作為設計平台，而外表則會與早前嘅D1概念車相似；而從預想圖中可以睇到新車造型明顯變得年輕，一組照明度十足嘅頭燈，亦能令造型加添一份吸引力。然而，雖然該消息未有關於車廂配搭嘅資料，但一般相信車廂空間會來得更寬敞，不過仍有待廠方公布有關資料後方可作實。引擎配搭則會與現有型號相近，頂級版有機會配用一台4.0公升W8引擎，另外更會配用一套四驅系統㖭。新車有望於2004年推出，各位車迷屆時就要留意一下喇。