今個暑假絕對係鼠類橫行，《哈姆太郎》、《一家之鼠超力仔2》等卡通片、電影全部都係以倉鼠、老鼠仔掛帥，放假想養寵物陶冶性情，佢哋一定入圍。呢期除咗熊仔鼠、長毛鼠等倉鼠類多人飼養之外，腳長、尾長嘅跳跳鼠亦係新寵之一，睇見佢彈吓彈吓，包你話得意。
記者：張穎倫 攝影：周旭文
想飼養較特別的寵物，呢隻跳跳鼠絕對係一個唔錯嘅選擇，佢原產自澳洲，同樣屬於倉鼠類，但在香港較為少見。佢嘅外形有啲似松鼠，但就腳長、尾長，全身連尾有成6吋長。雖然好似好大隻，但佢只利用長長嘅尾巴嚇走敵人，無乜實際攻擊能力。另外，跳跳鼠唔會用腳行，只會好似袋鼠咁彈嚟彈去，最搞笑係唔識用手推嘢和搬嘢，只係識用頭不停推、不停推，絕對稱得上係埋頭苦幹。
雖然每隻長毛鼠嘅性格都好相近，但原產敍利亞嘅米色長毛鼠就特別定性。BB嘅時候，佢一樣好鍾意四圍走，跑得好快，不過到佢大咗之後就變得非常定性，成日坐定定。佢鍾意過群體生活，就算將佢同其他長毛鼠放埋一齊都唔會打架。
喜歡大隻得意嘅倉鼠，原產敍利亞嘅敍利亞長毛倉鼠絕對係一個唔錯嘅選擇。好似呢隻啡色嘅長毛鼠，身長達到5.5吋，比見開嘅細種倉鼠至少大1吋，身體兩側嘅毛長得特別長，外形好靚好得意。加上其外形肥嘟嘟，個性又溫馴，甚少咬人，最適合小朋友飼養。
原產俄羅斯嘅小紫王，聽個名都知佢唔普通，佢唔單止擁有一般細種倉鼠嘅快速動作，而且非常獨立，獨個兒住都冇問題。如果同其他倉鼠走埋一齊，隨時會有爭地盤打架嘅可能。雖然佢性格比較惡和緊張，受驚時更會咬人，但背部嘅一撮紫毛，就比較少見，令佢特別多人喜愛。
擁有一身金毛，原產自荷蘭嘅熊仔鼠，睇落十分高貴，身長都係介乎4至5吋左右，但體形就似一隻熊仔多過似鼠類，肥得嚟向橫發展，行起上嚟好有霸氣，搞笑到暈。但咪睇佢大大隻以為佢好好打，其實佢只會靠個樣嚇人，行又行得慢，日日掛住瞓，攻擊力近乎零。
電影中嘅超力鼠雖然只係一隻白老鼠，但喺香港就比較少人飼養，通常都係留番嚟做實驗。若然鍾情白色的鼠類，原產自荷蘭，俗稱白倉嘅小銀狐就最啱你！佢同其他細種倉鼠一樣，身長只得4吋左右，外形有啲似白老鼠，但就懂性好多，鍾意同人玩。佢最特別係背部一撮銀毛，睇落比其他倉鼠有型得多。
最新落成嘅倉鼠豪庭，無論係室內，抑或室外設計，都依足著名「森林家族」大屋為藍本，採用歐洲別墅式設計，並由日本製造，盡顯王者氣派。屋內分上、下兩層，並有專用樓梯連接，更附送全屋名貴枱、櫈家具。另外又有沖涼房、水樽等設備，倉鼠亦可利用轉輪跑步KeepFit，真係舒服到暈！
如果覺得豪宅比較難負擔，本屋苑亦提供細單位以供選擇。呢個單位採用傳統倉鼠屋的鐵枝設計，但仍然分上、下兩層，為倉鼠提供活動轉輪，屋外以綠色、紫色、黃色、紅色等鮮豔顏色作配搭，最啱倉鼠過二人世界。再加上佢可以與同系列嘅倉鼠屋組合擴建，倉鼠將來生兒育女的話，可以買多間屋作擴建之用。
由於各類倉鼠都喜歡吃瓜子，以往唔少人都會以瓜子嚟餵飼倉鼠，但其實食得太多瓜子的話，對佢哋個膽會有不良影響。所以新一代飼養倉鼠，都會以混合糧為主，好似呢隻Mazuri嘅倉鼠糧，由多種穀物製成，可以為佢哋提供均衡營養，夠晒健康。
好多人見到倉鼠都話佢哋日日掛住瞓，其實佢哋屬於晝伏夜出嘅動物，夜晚先鍾意四出活動，所以白天就唔多願郁，請大家原諒。而在氣溫寒冷嘅時候，佢哋更會蒙頭大睡，瞓完再瞓。而佢哋平均都有三年壽命，仙遊嘅時候請節哀順變。
大部份倉鼠都好注意自己嘅儀容，喜歡幫自己清潔，大家毋須操心。不過長毛倉鼠就要勞煩你每日用牙刷幫佢梳毛，以免佢啲毛打結。
倉鼠最好由細細隻開始養，若然要養多過一隻的話，就最好一次過一齊購買一齊養。皆因佢哋長大後好鍾意霸佔地盤，如果唔係由細見到大，就一定會打架。
寵物城（26260406）
何文田太平道2號地下及一樓
PeteggShop（23323123）
油麻地彌敦道534-538號現時點商場2樓242號舖