灣仔區議會宏揚灣仔歷史，非常落力，噚日搞咗個「灣仔舊貌展新姿」展覽，幫大家尋找百多年來灣仔向外遷移咗五次嘅海岸線。
講開灣仔呢個最早發展嘅區域，典故當然唔少，以前叫「下環」，百幾年前已經對應否填海爭論不休，嘈到去英國。區議會又搵咗幾位老人家，口述灣仔歷史。
心繫灣仔嘅區議會主席林貝聿嘉即場講咗個笑話，話說佢好不滿明明起喺灣仔嘅「中環廣場」，因為發展商睇唔起灣仔，改名都要用「中環」兩字，非常誤導；她曾為此向當時既港督投訴。嗰位港督為咗安撫佢，隨口答話如果「中環廣場」唔肯改名，位於中環嘅港督府就一於改名做「灣仔港督府」，作為補償咁話，最後當然係不了了之。
八方記得中環廣場於九一年落成，係新地同信和為首發展，劉榮廣畫則，本來落重本，用鋼架結構，因為六四，改咗。唔知林主席究竟係向衞奕信定彭定康投訴呢？但聽呢位港督嘅回應咁油腔滑調、信口開河，大家可能都心中有數。
傳真︰2623-9278
電郵︰