一年一度書展，乃係買書盛事，左丁山收到入場贈券，唔入場唔好意思，咁啱上星期四中午開會之後，晚飯之前，有三小時空檔，於是飛的士去到會展中心，直奔書展。點知冇得「直奔」，必須跟大隊，行路兜兜轉，卒之入到第一展覽大堂，嘩，人潮洶湧，連「上海出版社」都幾乎逼唔埋去。莫講其他大店如三聯、商務、皇冠。咁多人，睇書睇唔到，買書都冇心機，只得匆匆（其實想快都唔得）巡咗半個圈，喺中華、三聯買咗幾本書就想鬆人。點知在中大出版社攤位外面，碰到經濟分析師。分析師乃愛書之人，蛇王走嚟睇吓，到中大出版社攤位買中英對照嘅著名小說（如白先勇《台北人》），話畀個仔睇，驚佢在外國讀書，唔記得中文喎。既然如此，立即推薦佢買本中大出版社嘅《漢英小字典》（九四年二次版，第四次印行），售價一百四十五元，原來有折頭，只需一百一十五蚊，分析師匆忙買下，買完就閃，因為佢都頂唔順啲人潮也。
左丁山買嘅書之中，其中一本係中華書局出版，顧頡剛（史學大師，一八九三─一九八○）口述，何啟君筆記整理嘅《中國史學入門》，呢本小書係顧頡剛一九六五年在北京香山療養院休養期間，全憑記憶與滿肚墨水嘅口頭講述，筆記簿僥倖逃過文革浩劫，得以重生。全書內容深入淺出，講中國民族形成、諸子百家之說、雜史經學……對中國歷史有興趣嘅不可不讀。