無綫劇集《烈火雄心II》下個星期一晚開始播，硬撼亞視韓劇《藍色生死戀I》，噚日該劇演員王喜、張可頤同鄭嘉穎等，就去咗將軍澳宣傳，王喜係唯一一個有份拍《烈火雄心》第一集同第二集嘅男主角，王喜話：「大家千祈唔好誤會，呢套唔係《烈火雄心》嘅續集，今次我係做一個單親爸爸，帶住一個七歲大嘅女，老婆係俾車撞死。」
張可頤喺套劇入面係做一個醫護隊目，佢話：「今次係我拍劇最認真嘅一次，拍完套劇又學到嘢，全套劇係真材實料，係留番嚟打亞視，班高層都睇好，照我保守估計，會有三十四點（約二百一十八萬觀眾）收視。」
而鄭嘉穎前排突然間入院，搞到拍緊《黑夜彩虹》時，都話要換角，佢話：「多謝關心，我都出咗院成個月，做咗好多次檢查，係糖尿病引致血壓高，係遺傳，我媽咪三十幾歲就有，係我早咗有，𠵱家就注意飲食，已經戒煙戒酒。」
噚日有報道話鄭秀文（Sammi）準備退出娛樂圈，Sammi噚日接受電話訪問時否認其事，佢話：「呢個係美麗嘅誤會，我絕對冇諗過要退出，只係𠵱家心態唔同，想花多啲時間喺生活方面，學吓畫畫咁，但我仍然會唱歌拍戲，有排做呀。」Sammi新碟𠵱家至二十九號喺各唱片舖作預售，不少Sammi歌迷以為Sammi以後真係唔唱，於是趕住去預訂。
李龍基噚日喺大華酒店舉行「李龍基香港回憶演唱會」記者會，演唱會喺九月六號同七號喺灣仔伊館開兩場，到時佢重請咗威利做嘉賓。威利噚日喺記者會話：「𠵱家嘅天王巨星，聽嚟聽去就只係識張學友一個。」至於陳奕迅和謝霆鋒又如何，威利就話：「兩個都幾好呀，不過陳奕迅要再鍛煉下先，謝霆鋒都唔錯，但就叫佢唔好搞咁多嘢。」
張衞健前日喺台灣為新碟宣傳開記招，他請得劉德華到現場搞氣氛，華仔喺台上玩踢爆，佢話平時叫張衞健女友張茜做張太，呢個都未算，華仔重即場打電話畀張茜，張茜二話不說就爆健仔平時最鍾意同佢講：「Baby，Iloveyou！」搞到健仔鬼死咁尷尬。
錢嘉樂做導演，搵咗日本諧星岡村隆史同性感肉彈酒井若菜演出嘅《無問題2》，除咗有元彪、盧巧音、李燦森等參演之外，重搵咗好多好友客串，好似有羅家英扮大提琴家馬友友、鄧兆尊扮警司，當然唔少得錢嘉樂女友李珊珊，佢為咗支持男友，抽咗兩個鐘頭去片場客串一角㖭！
有報道話蔡少芬（Ada）嘅外公病逝，Ada在靈堂時與斷絕母女關係兩年嘅黃素梅緊抱痛哭，足證母女依然同心，Ada噚日返電視城開工時對此事話：「屋企嘢我唔講，多謝大家關心。」當記者追問佢有冇真係同阿媽擁抱時，Ada就迴避話：「你哋乖啦。」
亞視第二輯嘅《百萬富翁》前幾日錄影第一集，參賽者張港生連過十四關，勇奪五十萬獎金，噚日重特登開記招，即場由亞視行政總裁陳永棋同主持人陳啟泰頒發五十萬嘅支票畀張生。做緊工程從業員嘅張生話：「今次都係靠運氣，我會將所有嘅獎金畀晒我老婆。」
陳小春前晚戴上成身飾物到紅館擔任陳慧琳（Kelly）演唱會嘅嘉賓，Kelly取笑小春穿金戴銀，小春則開玩笑話要喺Kelly演唱會上拉客，等佢遲啲開個唱時會多啲人支持，而Kelly亦即場答應做小春個唱嘅嘉賓，之後佢哋重合唱一曲《我不夠愛你》。