唔知係咪經濟唔好，平貨受歡迎？喺板仔界屬佐丹奴級數嘅「洩嘟時」，今個夏天突然水鬼升城隍，以前天后排隊搶猿人班迷哥迷姐，如今就轉晒去尖沙嘴香港「洩嘟時」專門店搶貨，每次返貨各人十分緊張，「捕」喺門口等開舖，尤其白色大碼入手非常困難，遲一步都買唔到。
今時今日好難再有咁好景，只因「洩嘟時」忽然炒得，旺角各水貨店齊齊力谷，凡日本版、美國特別版或Custom-made系列（近季剛推出，產量少，絲印繁複，所以賣貴幾十蚊）一律五百蚊樓上先有交易，香港「洩嘟時」照正價賣，只賣兩三百蚊起，點會唔多人搶，陰謀論者又話水貨舖都喺度入貨。
香港水貨舖有冇嚟排隊就唔敢肯定，但上個禮拜就畀我碰見廣播道名DJ「當勞」嚟入貨，重即場打電話畀大佬「DJ林」匯報返咗咩新貨，最後幫大佬買幾條褲走人，唔知道有冇幫自己買？
口痕友話大食Jack犀利，連「當勞」都認得，其實我邊有咁醒，只不過係佢打電話畀大佬時大聲話自己係「當勞」，令到店內係人都知。不過做演藝界真正慘，收工後重要頻撲，祝佢早日上岸。
主持人：大食Jack
八卦熱報：