經過資料搜集，終於鎖定一位可信賴的中醫師（沒有打算向大家介紹，因為介紹醫生可大可小），於是上門求助。中醫師非常有耐心地聆聽我的病歷，而我亦盡顯編劇本色地講得繪影繪聲。中醫師一邊聽一邊細心觀察，完成了「望」與「聞」後，他開始「問」與「切」。
「你好似好多嘢做，件事發生嗰陣有冇覺得好疲倦？」，「精神係咪成日緊張？」，「有冇試過唔舒服，例如係大感冒？」我的答案全是：「有」。
翌日再往見中醫師，只見他的桌面堆了幾本醫書，他拿起其中一本書，然後說：「查過書，你呢種應該唔屬於輕微中風或者面部神經麻痹，書中有記載過你呢種情形，按推敲應該係你當時疲勞過度加上精神緊張，趁住你大感冒嘅時候，風寒入侵咗神經系統，導致面部神經輸出錯誤訊息，令到左眼皮肌肉痙攣。」每次都係聽到醫生話我隻眼唔係因為乜，唔係因為物搞成咁，至於真正原因係乜嘢，今次都係第一次聽到。
「如果你事發之後即刻做針灸，我百份之百有信心幫到你，因為好多病人因中風後歪嘴，針灸都一定幫到復元，問題係事發已一年多，肌肉已經習慣咗，就好似一嚿大石唔知再推唔推得郁，喚唔喚得醒番啲神經。」有濃厚寧波口音的中醫師詳細地解說，「可以試吓隔日做針灸，連續十次，睇吓有冇幫助，然後再決定。」
本來一心諗住去做矯型手術，但又驚做完之後會睇落好唔自然，如今聽到重有第二條路，老虎都試一試。
結果，十五分鐘後，拮到成塊左面都係針……（待續）