美股延續上周五跌勢，周一繼續表演插水，杜指再跌2.9%，以7784收市，但港股噚日低開高收，回升203點，預先反映周二晚美股將有大反彈。
趙飛雲一早預咗港股隨時反彈，所以一見期指升破早段頂部10035，馬上沽出恒指Put輪9205，跟住就睇實恒指幾時受阻回頭，結果走勢比預期強勁，以大陽燭完全補回周一下跌裂口，有單日轉向味道。過往經驗，一旦大市走勢出乎意料之外，應檢討有否睇漏嘢，就算一時搵唔到，亦應提高警覺。
杜指過去11個交易日跌咗10日，共跌1595點，跌幅17%。相對而言，港股同期僅跌696點，跌幅6.4%，其實已大大跑贏美股，而噚日港股率先反彈203點，因此就算美股噚晚真係大反彈，今日都不應隨便高追，事實上過往美股反彈港股跌十分常見。目前大市趨勢仍向淡，除非呢幾日能以大成交衝破10400重大阻力及企穩，才可確認噚日低位9977見底。
趙飛雲目前以開放態度睇市，如果恒指升近10400受阻，則買入恒指Put輪9205，博大市反彈完再尋底；如果恒指以大成交衝破10400，則追入恒指Call輪9201。
趙飛雲