矯型醫生這名詞有點陌生，但如果說整容醫生，大家即刻「啊」一聲，完全明白。非常針對性地找到一位眼科矯型醫生，他看罷了我的病歷後，思考了良久，然後綜合出一點意見：「我同意眼科醫生嘅診斷，身體健康應該冇問題」，詳細端詳了我的左眼片刻後繼續說：「估計係你左眼嘅上提肌接收到錯誤訊息，上提多咗少許，所以就形成咗大細眼。」
「點解無端端會咁嘅？」我實在太想知道答案。
只見醫生面上掛着拈花微笑的笑容，然後不徐不疾地說：「人體就係咁，好多嘢都唔知點解亦好多時候搵唔到原因」，醫生見我個樣有多少氣結，於是語調中加強了鼓勵性，「你嘅左眼𠵱家由單眼皮變成雙眼皮，比較之下，原本正常嘅右眼反而變成無厘神氣，正所謂左眼似董建華，右眼似梁朝偉，不如就將原來單眼皮嘅右眼變埋雙眼皮，咁就靚仔晒。」
直情係「未開刀，先興奮」，大概係面上嘅笑容強烈地將呢個訊息傳咗畀醫生，所以醫生又連忙作出修正，「但係你首先要好好哋休息幾個月，瞓到足晒，然後才可準確地量度兩眼大細之差距，再然後才可做矯型手術。」
今時今日咁嘅環境，正式係手停口停，保險公司又話唔包，你話除非真係大吉利是病到唔郁得就冇得講，否則大細超都係要開飯，點停幾個月？
突然有一日，唔記得係邊位大俠行過身邊時丟低一句話：「點解唔試吓針灸？」咦？係喎！點解早諗唔起，係要有人提先至醒起……
（待續）