方力申（Alex）噚日去淺水灣拍攝《警訊》，內容主要係叫市民小心沙灘老鼠同呼籲年輕人要小心結交朋友，Alex重獲頒一頂水晶警帽同紀念旗。
本來Alex只需要跟住攝影機上面嘅稿照讀就得，不過佢話由於反光同埋要扮嚴肅，所以NG咗十次咁多。
當Alex離開現場時，有兩個着三點式泳衣嘅女仔要求同佢合照，其中一個重成個「縮水陳奕詩」咁。對於合照一事，Alex話一啲都唔覺得尷尬，因為嗰兩個女仔都唔係太過熱情，反而佢有時會俾自己啲fans嘅熱情舉動嚇親㖭。
小雪噚日去到尖沙嘴，為「e-mag模特兒大賽」擔任評判，小雪未入行之前都做過模特兒，不過佢嘅底線只限於着背心同埋短褲。
小雪近排就忙於籌備新碟，佢話新歌歌詞會反映到佢嘅愛情觀感，不過講到小雪同前VRF成員阿Ray拍拖，佢依然否認。
張家輝同盧淑儀噚日喺灣仔會展拍《賭俠2002》外景，家輝話之前睇新聞，知道有個醫科學生去澳門豪賭輸咗十二萬，之後重向貴利借多二十幾萬再賭過。家輝話自己咁啱拍緊賭片，不過並唔係鼓吹賭風，只係一種娛樂包裝，佢重話嗰個後生仔雖然淒涼，但都應該受吓教訓。
許志安噚日朝早為滙豐銀行海洋中心分行擔任剪綵嘉賓，喺舞獅採青時，生菜被拋到安仔面前，嚇咗佢一跳。安仔話最近以十幾萬嘅價錢買咗架日本新車bB，佢話：「我貪架車唔可以開得咁快，因為我揸快車嘅年代已經過咗啦。」
陳法蓉嘅三隻愛犬日前俾一隻惡犬咬傷，其中一隻狗BoBo重要留醫。陳法蓉前日趕去拍戲前，先去獸醫處探BoBo，佢前日喺電話度話：「BoBo嘅情況重未知，佢身上插住好多管，我見到都好傷心。而另外兩隻狗雖然返咗屋企休息，但事發後佢哋一直唔肯食嘢，再係咁就要去獸醫處吊鹽水。」
高志森噚日喺觀塘開記者會，透露會同基督教團體「影音使團」合作，拍攝一套二十集嘅電視劇《生命天使》，合演嘅係一班好戲之人好似劉兆銘、焦媛（左）、陳松伶、黃淑儀同埋喬宏叔遺孀小金子等。高志森話每集製作費會係五十萬左右，一定會交足功課。