成也風雲，敗也風雲，有時炒股就係咁，早幾個月好多二三線股仔，因為獲得外資大行垂青，令股價如坐直升機。不過，時辰一到，外資大行話沽就沽，完全冇面畀。
好似上海置業（1207），上市以來一直係冷門股，但數月前忽獲歐資大行睇中，又出報告又做推介會，跟住重幫佢搞配股，結果在5月份成功以每股1.18元，配售2.2億股新股，集資2.6億元。
之後上海置業股價一度湧過上去1.30元，然後一直在1.20元附近守得好穩陣，但近期股價隨大市回軟，噚日更一度跌穿1元水平，收市抽回1.01元，但仍跌8.2％。
經紀陳話，沽盤明顯來自該間歐資行，但其實都好難怪，𠵱家咁嘅時勢，人人都想手揸現金唔揸股票，話之當初捧到你上天。雖然不時見到該間歐資行亦掛出買盤，但經紀陳話唔排除係托住嚟沽。
慕容小初