美股上周五創4年新低，跌近8000收市，但港股走勢就比預期好，恒指噚日竟然連10000都跌唔破，而長江生命科技（8222）重可以守住喺2元招股價水平，重有係中銀香港（2388）夠膽以每股8.50元定價，相信係有頗多策略性投資者入大飛支持，否則冇理由招股價可以定到咁高。
中銀香港已定價，暗盤亦好似幾活躍，大部份叫價由先前7元水平，升至介乎8元至8.70元，但暫時未聽過有暗盤在8.50元以上成交過。
佑威國際（627）噚日大跌24%，收報0.38元，而且成交大增至3800萬元。其實此股表現已經算好，因為重識得由低位0.30元反彈上0.38元收市，唔似早幾日華聯國際（969）及正中藥業（327）大插水之後完全反彈乏力。
Cookie問阿虎重有邊隻二三線股會爆煲，等佢可以提防吓。大姐！你估阿虎係股神咩？阿虎所知始終有限，總之近排莊家股少玩為妙，特別千祈咪高追。
ｉ師傅話，美股杜指下試8000，經濟難望大幅反彈，加上出現史無前例及芬佬最棹忌嘅企業假帳浪潮，杜指有機會返回近年大升市前嘅起步點約5000水平，因此港股跌破9000又有何難？
光宇國際（1043）最終決定配股唔供股，配售3500萬股，每股2.15元，集資7525萬元。配股價較停牌前2.35元只係折讓8.5%。黑客話，今次大戶肯接受咁細嘅折讓幅度，主要係因為憧憬比亞迪（1211）上市會大炒，而光宇亦可受惠。噚日復牌股價大跌7.45%，收2.175元，差啲跌破配股價。並非大戶冇實力，主要因為時機未到。
阿虎