近期，各大車廠都落力研製多款新車，以迎合不同用家需求；而歐寶車廠亦唔例外，廠方繼推出新一代Vectra車系後，又預計喺2004年為旗下Astra車系，推出新一代版本，以爭取更高市場佔有率。
該消息指出新一代Astra嘅造型，將會與早前展出嘅Signum概念車相似，同樣以極具流線型嘅車體出現；而從預想圖中可以睇到，新車一份獨特嘅造型，炯炯有神嘅頭燈別具吸引力，整體望落去重帶有些許跑味㖭。車廂設備亦會經廠方重新設計，但仍會以實用為主；空間亦會較現有型號來得寬敞，配合上承托力極高嘅座椅，因而令乘坐舒適度得以提升。
引擎配搭亦有多個選擇，當中包括有1.3、1.6、1.8及2.2公升電油引擎，而動力輸出數值亦各有不同，以滿足不同用家需要。率先推出嘅三門掀背版，將於2004年底推出，而其他型號則會於2005年後陸續推出，有興趣嘅車迷，不妨拭目以待喇。