昨日一早去到股票行嚴陣以待，可能外圍日股先跌後反彈，加上美元企穩，港股只係低開159點，開10166，睇咗幾分鐘，恒指都係窄幅上落，趙飛雲按原定計劃沽出新地（016）及中移動（941）止蝕，並在0.197元買入60萬份恒指Put輪9205。
之後恒指大部份時間在10120至10160反覆上落，尾市沽壓稍大，恒指一度跌穿10100，但瞬即回升，趙飛雲於0.202元先沽出40萬份恒指Put輪9205獲利，留番20萬份過夜。
杜指期指噚日仍然偏軟，但杜指9RSI已跌至17大超賣，隨時有反彈，加上噚日港股低開後企得相當硬，因此雖估計美股及港股走勢將反覆向下，但亦唔排除會有一二百點反彈，所以減低9205持貨量，寧願今日睇定再追過。
恒指短期或有反彈，初步阻力下跌裂口10280至10182，不過就算破位亦難升穿10400重大阻力，短期策略可趁恒指反彈受阻，伺機買入9205。
趙飛雲