以前，在香港做飲食業說是賺錢生意，但現今經濟陷入困境，飲食業不再像從前風光，好像有幾十年歷史的著名食肆路邊雞，都要嘗試在內地找出路。不過生意並不是想像般順利，想到內地搞餐廳的朋友，定要參考老闆冼先生的經歷。
記者：羅蘭
攝影：KennyWong
半年前，香港著名食肆「路邊雞」的老闆之一冼生到深圳黃貝嶺鳳凰路開了一間飯店，同樣取名「路邊雞」，其菜式跟香港差不多，價錢卻較便宜。
「自從九龍城個機場搬去赤鱲角之後，生意少咗三分一，加上利潤又少，咪諗住上嚟試吓囉。其實我自己都唔夠膽㗎，係內地嘅朋友話可以幫我做聯絡，佢喺上面又有人事關係；如果唔係，我都未必會上嚟。」食店現時除了冼生這位老闆外，還有一個香港人和一個內地人拍檔合資。
做食店最緊要捉到客人口味，冼生話現時這間路邊雞，除了有香港式粵菜外，還會加入少少如香辣蟹、四川菜等，去迎合外省食客。
「我哋有七成食客都係香港人，三成係本地人，但香港人至多每星期上嚟一兩次，靠香港人根本好難維持，但內地人又唔識我哋呢間食店，所以生意唔多。最慘係香港人鍾意清淡，內地人就鍾意味濃。我試過有一個上海嚟嘅食客，試我哋呢度嘅魚翅，我哋嘅魚翅係用上湯去熬幾粒鐘，點知佢話無味，然後我親眼見到佢落咗一羹鹽同一羹味精落去，話咁先至有味喎，你話叫我點做。」於是冼生惟有加入一些香口味濃的菜式如香辣蟹、炸蝦餅、海鮮卷、炸生蠔等，就是為了招呼這類愛吃濃的客人。
擔心的不只是食客的口味，還要提防冒牌貨。冼生自己本身也是做廚的，開業前他自己都有試做菜式，但做來做去就總是做不出在香港時的味道，經過一番研究，才知道所用的調味料，原來全是冒牌貨。
「我同個大廚一齊去市場度辦貨，點知間舖頭送嚟嘅全部係假貨，起初我哋都唔知，但有次做菜式，做嚟做去都好鹹，後來仔細研究，先知包味精有一半係混咗鹽，於是我哋立即檢查所有調味料，嗰啲生抽、老抽、雞粉、醬料咁，全部係冒牌，我重入咗萬幾蚊貨，好在有得退。內地就係咁樣，如果你唔醒目，分分鐘會俾人呃。」
到內地做生意，碰壁當然少不了。「最初我以為地點唔係好重要，只要菜式好味自然會有客，但內地人嘅概念同香港人唔同，佢哋鍾意到旺區食嘢，一係就到好平嘅大牌檔，一係就到好貴嘅食府做豪客，我哋呢啲中型飯店就好難做。
「我租呢個舖都係貪佢平，因為如果喺旺區，舖租同香港有得揮，好似我呢度咁就要20萬一個月。呢度重係羅湖區委物業，所有牌照如工商、消防、衞生、稅務咁，都係由業主幫我搞掂。但唯一唔好係地點比較偏遠，又要轉入橫街。加上呢個月門外要修路，更加無人想入嚟，直接影響我哋嘅生意。
「我有諗過做宣傳㗎，但費用好貴，幾百蚊登廣告只係得嗰幾十字；想話派單張啦，喺呢度又屬於違法嘅，捉到重要罰?300。曾經有香港嘅雜誌同我哋做訪問，但得一、兩次又無乜用，始終我想吸引本地人，所以都幾頭痛。」冼生曾經嘗試想在街頭放一個燈箱，但又給那邊店舖的業主反對，因為那兒正好有間食肆，要保障自己的租客。
除了租舖要留意地點外，冼生還奉勸大家付頂手費時最好不要太快找清尾數。「原來呢度畀錢搵人裝修係唔會一次過找清數，佢哋通常只會畀五、六成先，尾數就會拖好耐都唔找。我哋就試過有裝修公司上嚟收數，好在俾我哋擺平無事咋。
「𠵱家惟有睇長線啦，因為業主話遲啲樓上會有足浴、賓館、歌舞廳，希望可以帶旺我哋，因為當初佢哋話有咁多嘢我先會作咁大投資。我諗等多兩個月後應該搞掂，我估到時生意額可以上升三成，希望一年後可以回本就好。」
食肆要拿的牌照較多，有消防、衞生、工商、稅務等，但冼生食店所需的牌照因已由業主代勞，所以便不需費心申領事宜。
開業日期：2002年1月
租金 ?64,500
（約3,300平方呎，2個月按金1個月上期）
頂手費 ?100,000
裝修 ?250,000
廚房用具 ?60,000
入貨 ?40,000
員工（共30名員工） ?35,000
員工宿舍（連按金、上期和家具） ?10,800
雜費（印刷、枱布、碗碟等） ?50,000
流動資金 ?50,000
總投資額 ?660,300
平均每月營業額：?170,000
平均每月盈利：?20,000
1﹒直接跟業主接洽：這樣可免除中間的頂手費
2﹒內地朋友做拍檔：可以方便申領牌照
3﹒確定身份才付錢：因內地騙徒特別多，常冒認政府人員上門呃錢
4﹒別一早找清尾數：付頂手費時要預留尾數，以應付上手未付的任何費用
5﹒律師樓交收金錢：所有金錢往來要在律師樓辦理，以防有詐
面對香港經濟不景，裁員不停，失業率持續上升，香港經濟逐步轉型，人人北望。「北上創業」版訪問一些香港人在內地成功創業的例子，如閣下是其中一分子，又願意將你的經驗跟讀者分享，請聯絡我們。來信請寄將軍澳工業邨西駿盈街八號《蘋果日報》副刊「北上創業」版收或傳真：27420542。請附聯絡電話。