阿娥的八十一歲父親張伯近日肺病惡化，性命垂危，她要日以繼夜守在病榻旁照顧，不但身心俱疲，經濟亦陷困境，就連購買一百多元一包成人紙尿片給老父也負擔不來，深感彷徨無助。
記者日前到醫院探望張伯，見他插着胃喉，陷入昏迷狀態。在旁的四十六歲阿娥淒然表示：「嗰日我買完餸返屋企，得知阿爸先前突然喺廳度暈低，要由同屋打電話叫白車（救護車）送入急症室，我趕到醫院，見阿爸已經醒番，佢重識得叫我唔使擔心。點知三日後阿爸一直講唔到嘢，神志不清，無論我同佢講乜，佢都只能夠呆望住我，無辦法回答。」
阿娥的父親張伯，早年隻身由潮州來港謀生，多年來靠做地盤工人，賺錢養活鄉間妻兒。約十五年前，張伯患上肺病，加上已屆退休年齡，自此倚靠微薄綜援金維持生計。
今年初，長女阿娥獲批單程證來港定居，令張伯深感安慰，不致老來仍落得孤零零一人獨自生活。
如今張伯肺病病危留醫，面容憔悴的阿娥歎謂：「阿爸患肺病後要定期食藥同覆診，退休後寧願留喺香港生活。𠵱家我落咗嚟，以為可以好好照顧阿爸，享天倫之樂，估唔到變成咁！今日醫生重話我阿爸嘅情況好唔穩定，令我好擔心！」
刻下，阿娥更為缺錢購買醫療用品給父親而煩惱不已，「以往靠阿爸一份綜援應付家庭開支，𠵱家阿爸留醫，去唔到銀行攞綜援金，我又唔可以代簽名代領，我唔單止無錢交六同七月份嘅屋租、水電費，連買一包一百六十蚊嘅成人紙尿片畀阿爸都好困難！」阿娥因來港不足一年，未合資格申領綜援。
負責跟進阿娥與張伯個案的工業傷亡權益會社工馮姑娘稱，已經協助阿娥分別向社會福利署及有關銀行，爭取獲恩恤安排，希望可改以女兒名義提取張伯的綜援金應付家計，惟有待當局審批。
有見阿娥經濟緊絀，蘋果日報慈善基金即時撥款六千元，助她購買成人紙尿片給老父張伯、清還拖欠的兩個月屋租和水電雜費，以及應付短暫生活需要。
捐款編號：C0630
暖流熱線
電話:29908688
傳真:23702192
電郵:
網址：