我Apple姐日日睇報紙，發現不論中外明星，個個結婚冇耐就話要分開，真係好鬼兒戲。 嗱！好似日本歌手安室奈美惠同佢個排舞老師老公阿Sam之嘛，結咗婚四年又話離婚啦，早排阿Sam重專登嚟香港為樂壇新人麥浚龍造勢㖭。 恩愛撐枱脚 以為阿Sam婚姻失敗，所以寄情工作啦，但係我喺阿Sam留港嗰段時間，有晚喺鯉魚門食海鮮，就見到阿Sam同一個貌似安室奈美惠嘅女子，好恩愛咁喺度撐枱脚，照咁睇，我真係唔明點解忽然佢哋又話離婚？